अमेरिकामा हेलिकोप्टर दुर्घटना हुँदा तीन जनाको मृत्यु

काठमाण्डौः अमेरिकाको क्यालिफोर्नियामा हेलिकोप्टर दुर्घटना हुँदा तीन जनाको मृत्यु भएको छ।

आगो निभाउने अभियानका क्रममा उक्त हेलिकोप्टर दुर्घटना भएको बीबीसीले जनाएको छ। समाचारअनुसार सो अभियानका क्रममा दुई हेलिकोप्टर ठोक्किएको थियो। तीमध्ये एउटा दुर्घटनामा परेको र अर्को सुरक्षित अवतरण गरेको थियो। दुर्घटनामा हेलिकोप्टरमा सवार तीन जनाकै मृत्यु भएको अधिकारीहरूले जनाएका छन्।

राष्ट्रिय यातायात सुरक्षा बोर्डले उक्त दुर्घटनाको कारणबारे अनुसन्धान सुरु गरेको छ। क्याल फायरका दक्षिणी क्षेत्रका प्रमुख डेभिड फल्चरले घटनालाई अपूर्णीय क्षति भएको उल्लेख गरेका छन्।

‘हामीले तीन महान व्यक्तित्व गुमायौं। तीन बुबा, तीन श्रीमान, तीन साथी, तीन छोरा,’ उनले भने, ‘छोराछोरीहरूले बाबु गुमाएका छन्।’