निजी विद्यालयलाई राहत प्याकेज ल्याउनुपर्छ : सांसद राई

काठमाडौंः राष्ट्रिय सभाकी सांसद विमला राई पौडेलले निजी विद्यालयहरू बचाउनका लागि सरकारले राहत प्याकेज ल्याउन माग गरेकी छन् । बिहीबार बसेको राष्ट्रिय सभा बैठकमा बोल्दै उनले निजी विद्यालय सञ्चालकहरूका लागि केही न केही राहत दिनुपर्ने बताएकी हुन् ।

शिक्षकहरूले चैत महिनाबाटै तलब नपाएको भन्दै सांसद राईले यस्तो माग गरेकी हुन् । सबै विद्यालय विगतमा कमाएको नाफाबाट स्टाफ धान्न सक्ने अवस्थामा नरहेको उनको भनाइ थियो । स्थानीय तहलाई वर्गीकरण गर्न दिएर सहुलियतपूर्ण व्याज लगायतको सुविधा दिनुपर्नेमा उनले जोड दिइन् ।

बैठकमा उनले भनिन्, ‘निजी विद्यालय सञ्चालकहरूका लागि राहत प्याकेज ल्याउन शिक्षा मन्त्रालय र अर्थ मन्त्रालयको ध्याकर्षण गराउन चाहन्छु ।’ कोरोना भाइरसबाट सुरक्षित स्थानमा स्थानीय तहलाई विद्यालय सञ्चालन गर्ने अधिकार दिनुपर्ने उनको भनाइ थियो ।

बैठकमा सात मिनेट सम्बोधन गर्दा सांसद राईले लकडाउनले गर्दा रोजगारी गुमाएर शुल्क तिर्न नसक्ने अवस्थामा पुगेका अभिभावक र पढाइबाट वञ्चित भएका विद्यार्थीको पक्षमा भने एक शब्द उच्चारण गरिनन् । पुरै समय दशकौं नाफा कमाएर शिक्षक–कर्मचारीलाई तलब नदिने विद्यालय सञ्चालकको उनले पक्षपोषण गरेकी थिइन् ।