सुदूरपश्चिम प्रदेश सभाको बैठक मंगलबारसम्मको लागी सूचना टाँसेर स्थगित

काठमाण्डाैंः सुदूरपश्चिम प्रदेश सभाको बैठक स्थगित भएको छ ।  आईतबार अपरान्ह तीन बजेका लागि बस्ने भनिएको बैठक अचालनक स्थगित भएको हो । सभामुखको आदेश बमोजिम प्रदेश सभा सचिवालयले सूचना टाँस गर्दै बैठक स्थगितको जानकारी गराएको थियो । अर्को बैठक मंगलबार दिउँसो ३ बजे तोकिएको प्रदेशसभाका सचिव राम धामीले बताए ।

 प्रतिपक्ष दलले सरकारसँग छलफल नगरेकाले फेरि अवरोध भए बैठक बसे पनि परिणाम नआउने भएकाले बैठक स्थगित गर्नुपरेको सभामुख अर्जुनबहादुर थापाले बताए । सरकारसँग असहमति जनाउँदै प्रतिपक्ष काँग्रेसले दुई दिन सदन अवरोध गर्दै आएको छ ।

सरकारसँग प्रतिपक्षले छलफल गर्नुपर्ने र समस्या समाधान गर्नुपर्ने उनले बताए। प्रदेश सरकारले असार १ गते ल्याएको बजेटमाथि छलफल गर्न असार १० गते बोलाइएको छैठौं अधिवेशनको १९ औं बैठक प्रतिपक्षको अवरोधपछि स्थगित भएको थियो।

असार १२ गतेका लागि बोलाइएको बैठक समेत प्रमुख प्रतिपक्षी दल नेपाली कांग्रेस र राष्ट्रिय जनता पार्टीले अवरोध जनाएपछि स्थगित भएको थियो।

प्रमुख प्रतिपक्षी दल नेपाली कांग्रेसका प्रदेश सांसद भरत खड्काले छलफल गर्ने विषयमा सरकारले चासो नै नदेखएको बताए। कोरोनालाई प्राथमिकतामा राखेर काम गर्न सरकारसँग माग राखिएको उनले बताए। क्वारेन्टिन व्यवस्थापन, कोरोना परीक्षण, उपचारमा सरकार गैरजिम्मेवार बनेको प्रतिपक्षको आरोप छ ।