‘अफ सिजन’मा पनि दर्जन बढी नेपाली चलचित्रको छायांकन

काठमाडौं । चलचित्र प्रदर्शन र छायांकनका लागि नेपालमा पुस महिना उपयुक्त मानिँदैन । सोही कारण विगतमा न त पुसमा चलचित्रको छायांकन गरिन्थ्यो, न त राम्रा ब्यानरका नेपाली चलचित्र रिलिज हुन्थे । तर, यसपटक पुसमा पनि आधा दर्जन नेपाली चलचित्र छायांकन भइरहेका छन् । थप आधा दर्जन नेपाली चलचित्रको छायांकन सुरु हुँदै छ । यसरी छायांकनका लागि बेमौसम मानिएको पुसमा अरू बेलाका भन्दा धेरै चलचित्र छायांकन हुँदै छन् ।

नेपाली चलचित्रका लागि २०८१ साल नै राम्रो साबित भएको छ । यस वर्ष गत वैशाखदेखि मंसिरसम्म रिलिज भएका धेरैजसो चलचित्रले बक्स अफिसमा राम्रो व्यापार गरे । त्यसैले पनि यतिबेला नेपाली चलचित्र निर्माणका क्रममा एकाएक बढेको छ । जसका कारण दिन छोटो हुने र जाडो निकै हुने पुस महिनामा पनि निर्माताहरूले नेपाली चलचित्रको छायांकन गरिरहेका छन् ।

विगतमा पुसमा छायांकन नहुने हुँदा प्रायः कलाकार तथा प्राविधिक फुर्सदमा हुन्थे । तर, यसपटक पुसमा पनि त्यत्तिकै चलचित्र छायांकन भएका कारण कलाकार तथा प्राविधिकहरू व्यस्त छन् । पुसमा कलाकारहरूले फुर्सद भएको बताएपछि निर्माता निर्देशकहरूले यस पुसमा ‘सेड्युल’ खाली भएका कलाकारहरूको छायांकन राखेका हुन् ।

व्यस्त अभिनेता अनमोल केसीदेखि विपीन कार्कीसम्मका कलाकारको समेत अहिले चलचित्र छायांकन भइरहेको छ । अनमोलको चलचित्र जेरी अनटपको काठमाडौंमा छायांकन चलिरहेको छ । छायांकनकै क्रममा रहेको यस चलचित्रका अभिनेता अनमोल केही दिनका लागि भनेर दुई दिनअघि अमेरिका उडेका छन् । उनी त्यहाँ प्रथम गोल्डेन नेपाली चलचित्र अवार्डमा सहभागी हुन गएका हुन् । अवार्डमा सहभागी भएर अर्को साता उनी नेपाल फर्किएपछि यस चलचित्रको बाँकी छायांकन फेरि अघि बढाइने भएको छ । अहिले बाँकी कलाकारको छायांकन भइरहेको निर्माण पक्षले जनाएको छ । निर्देशक सुयोग गुरुङले चलचित्रका बाँकी कलाकार आँचल शर्मा, जसिता गुरुङलगायतको छायांकन गरिरहेका छन् ।

यस वर्ष गत वैशाखदेखि मंसिरसम्म रिलिज भएका धेरैजसो चलचित्रले बक्स अफिसमा राम्रो व्यापार गरे । त्यसैले, पनि यतिबेला नेपाली चलचित्र निर्माणका क्रममा एकाएक बढेको छ । जसका कारण दिन छोटो हुने र जाडो निकै हुने पुस महिनामा पनि निर्माताहरूले नेपाली चलचित्रको छायांकन गरिरहेका छन्

अर्को चलचित्र कर्माको पनि पाँच दिनअघिबाट दाङदेखि छायांकन सुरु भएको छ । माघको दोस्रो साताबाट अभिनेता विपीन कार्की अर्को नयाँ चलचित्र पहाडको छायांकनमा जाने भएपछि निर्देशक सौरभ चौधरीले पुस सुरु भएसँगै दाङबाट कर्माको छायांकन थालेका रहेछन् । छायांकनका लागि दिन छोटो हुने भए पनि पुसमा विपीनको समय मिलेकाले आफूले यतिबेला कर्माको छायांकन गरेको उनले बताएका छन् । माघको दोस्रो सातासम्म यस चलचित्रको छायांकन सक्ने उनको लक्ष्य छ । चलचित्रमा विपीनसँगै उपासनासिंह ठकुरी, मुकुन भुसाल, दिव्यदेवलगायतका कलाकारको अभिनय रहेको छ ।

अर्को चलचित्र डोरीको पनि यतिबेला काठमाडौंमा छायांकन भइरहेको छ । यस चलचित्रको दुई साताअघिबाट छायांकन सुरु भएको हो । पुसको दोस्रो सातासम्म यसको छायांकन सक्ने लक्ष्य यसका निर्देशक अरुण लामाको रहेको छ । चलचित्रकी मुख्य अभिनेत्री अञ्जना बराइली माघबाट अर्को चलचित्रको छायांकनमा जानुपर्ने भएकाले पुसमै यसको छायांकन गरेको पनि निर्देशक लामाले बताएका छन् । यस चलचित्रमा प्रवीण खतिवडा, अञ्जना बराइली, शिशिर वाङ्देल, राज पौडेल, वीरेन्द्रसिंह कुशवाहा, विशाल राई, मिलन राई, कविता आले, सजन श्रेष्ठलगायतको अभिनय रहेको छ ।

यस्तै, अर्को चलचित्र प्रेम गीताको पनि यतिबेला काभ्रेका विभिन्न स्थानमा छायांकन भइरहेको छ । चलचित्रको अहिले काभ्रेको पाँचखाललगायतका क्षेत्रमा छायांकन भइरहेको यसका निर्देशक राजेन्द्र बस्नेतले बताएका छन् । दिन छोटो भए पनि मौसमले चलचित्रको छायांकनमा साथ दिइरहेको उनको कथन छ । यस चलचित्रको काभ्रेपछि काठमाडौंमा अब एक सातामा छायांकन सक्ने लक्ष्य राजेन्द्रको रहेको छ । प्रेम गीतामा सुशील पोखरेल, जान्हवी बस्नेत, अर्जुन गुरुङ (भँगेरी डन), साजिद खान, आशा पौडेल, दीपक केसी, खुश्बु पाण्डे, माधव केसी, मानसी शर्मा, दीपशन लिम्बु, मौसम खड्का, ममता माझीलगायतको अभिनय रहनेछ ।

यस्तै, यही १० पुसबाट अर्को नयाँ चलचित्र कल्लीको छायांकन सुरु हुने भएको छ । यसका निर्देशक लक्ष्मण सुनारले चलचित्रको सम्पूर्ण तयारी पूरा भएकाले यही बुधबारबाट छायांकन सुरु गरिने बताएका छन् । यस चलचित्रमा सौगात मल्ल, नाजिर हुसेन, वर्षा राउत, बेनिशा हमाल, उत्तम प्रधान, अर्पण थापा, बुद्धि तामाङ, कमलमणि नेपाल, माओत्से गुरुङ, रवीन्द्र झा, विनोद न्यौपाने, रेअर राईको पनि अभिनय रहनेछ । चलचित्रका निर्माता किरण नेपाली हुन् । यस चलचित्रको छायांकन कर्णालीमा गरिने हुँदा निर्माण टिम कर्णाली यात्राको तयारीमा छ । यतिबेला आफूहरूलाई कलाकारले समय दिएकाले चलचित्रको छायांकन पुसबाटै सुरु गर्न लागेको यसका निर्देशक लक्ष्मण सुनारले जानकारी गराएका छन् ।

अर्को चलचित्र जन्ते बाख्रोको युनिट पनि केही दिनभित्रै छायांकनमा जाने भएको छ । चलचित्रलाई सिमोस सुनारले निर्देशन गरिरहेका छन् । यस चलचित्रको १ पुसबाट छायांकन सुरु गर्ने घोषणा गरिएको थियो । तर, अब भने छायांकन सुरु गरिने निर्माण पक्षले जनाएको छ । अहिले यस चलचित्रको अभिनय कार्यशाला चल्दै छ । जन्ते बाख्रोको छायांकन सकेर अभिनेता सौगात मल्ल अर्को चलचित्र कल्लीमा जोडिने निर्माण पक्षको भनाइ । जन्ते बाख्रोमा सौगातसँगै आसिफ शाह, गरिमा शर्मालगायतको मुख्य भूमिका रहेको छ ।

यस्तै, छायांकनमा जाने तयारीमा रहेको नेपाली चलचित्र सोल्टिनीको पनि अभिनय कार्यशाला अन्तिम चरणमा पुगेको छ । यस चलचित्रको १५ पुसबाट छायांकन सुरु गरिने भएको छ । यस चलचित्रमा प्रकाश सपुत, परीक्षा लिम्बु, विल्सनविक्रम राई, प्रकाश घिमिरे, प्रेम सुब्बा, कविता आले, रवीन्द्र झा, सुन्दर धिताल र सुजन खतिवडाको पनि चलचित्रमा अभिनय रहने निर्देशक निर्देशक अर्जुन सुवेदीले जानकारी दिएका छन् ।

छायांकनका लागि उपयुक्त नभए पनि यतिबेला नै अभिनेता प्रकाश सपुतको समय मिलेकाले छायांकन सुरु गर्न लागिएको निर्देशक अर्जुनले बताएका छन् । माघबाट प्रकाश सपुत अर्को चलचित्र हरिबहादुरको जुत्ताको छायांकनमा जोडिनेछन् । सोही कारण पनि पुसको दोस्रो साताबाटै सोल्टिनीको छायांकन सुरु गर्न लागेको उनले बताएका छन् । राजधानीबाट