बालेन उदयसँगै भारतीय हिन्दुवादी संगठनको चासो, आरएसएसको गतिविधि बढ्यो

काठमाडौँ । भारतीय कट्टर हिन्दुवादी संगठन राष्ट्रिय स्वयंसेवक संघ (आरएसएस) का प्रतिनिधि तथा हिन्दु स्वयंसेवक संघ नेपालका राष्ट्रिय सहप्रचारक रेवित कुमारले काठमाडौं महानगरपालिकाका मेयर बालेन साहका निकट सहयोगी कुमार व्यञ्जनकारसँग भेटवार्ता गरेका छन्।

पछिल्लो समय नेपालमा बालेन साहको राजनीतिक प्रभाव बढ्दै गएको र उनी राष्ट्रिय राजनीतिमा निर्णायक भूमिकामा देखिन थालेपछि आरएसएसले नेपालस्थित आफ्ना प्रतिनिधिलाई बालेनसँग सम्बन्ध विस्तार गर्न सक्रिय बनाएको स्रोतको दाबी छ। यही क्रममा पाटनस्थित एक रेस्टुरेन्टमा बालेन साहका सल्लाहकार व्यञ्जनकार र आरएसएस प्रतिनिधिबीच भेट भएको बताइएको छ।

स्रोतका अनुसार सुरुमा उक्त भेटमा बालेन साह स्वयं सहभागी हुने तयारी थियो। तर भेटबारे मिडियामा सूचना चुहिएपछि उनले प्रत्यक्ष उपस्थित नहुने निर्णय गर्दै आफ्ना प्रतिनिधिलाई पठाएका थिए। भेटमा पछिल्लो राजनीतिक अवस्था, नेपाल–भारत सम्बन्ध, र भावी राजनीतिक सम्भावनाबारे अनौपचारिक छलफल भएको स्रोतको भनाइ छ।

बालेन साह आरएसएस प्रतिनिधिहरूसँग पहिलेदेखि नै सम्पर्कमा रहेको र उनीहरूबीच सम्बन्ध सकारात्मक रहेको दाबी पनि स्रोतले गरेको छ। बालेन साहले आफ्नो हिन्दुवादी छवि सुदृढ गर्न चुनावी प्रचारका क्रममा देशका पूर्वदेखि पश्चिमसम्मका विभिन्न मठमन्दिरको भ्रमण गरेको तथ्यलाई पनि सोही सन्दर्भमा हेरिएको छ।

हालै राष्ट्रिय स्वतन्त्र पार्टी (रास्वपा) ले बालेन साहलाई भावी प्रधानमन्त्रीको सम्भावित उम्मेदवारका रूपमा अघि सारेसँगै उनको राजनीतिक उचाइ थप बढेको छ। भारतविरोधी छवि बोकेका एमाले अध्यक्ष केपी शर्मा ओलीकै निर्वाचन क्षेत्रबाट उदाएका बालेन साहको राजनीतिक यात्राले नेपाल मात्र नभई भारतमा समेत चासो बढाएको विश्लेषण भइरहेको छ।

यस भेटघाटलाई लिएर राजनीतिक वृत्तमा विभिन्न अड्कलबाजी सुरु भएका छन्। तर बालेन साह पक्षले औपचारिक रूपमा यस विषयमा कुनै प्रतिक्रिया दिएको छैन।