मुग्लिङ-नागढुङ्गा सडक आजदेखि तीन दिन रातिमा बन्द हुने

काठमाडौँ । देशको मुख्य राजमार्गमध्ये एक मानिने मुग्लिङ–नागढुङ्गा सडकखण्ड आजदेखि तीन दिनसम्म रातिको समयमा बन्द हुने भएको छ। जिल्ला प्रशासन कार्यालय चितवन ले सार्वजनिक गरेको सूचनाअनुसार सडक स्तरोन्नती कार्यका कारण उक्त खण्डमा सवारी आवागमनमा अस्थायी प्रतिबन्ध लगाइएको हो।

प्रशासनका अनुसार चितवनको इच्छाकामना गाउँपालिका–४ अन्तर्गत पर्ने घोप्टेभिर लगायतका विभिन्न जोखिमयुक्त स्थानहरूमा सडक मर्मत तथा स्तरोन्नतीको काम सञ्चालन गरिनेछ। यही कार्यलाई सुरक्षित र प्रभावकारी बनाउन आजदेखि चैत १९ गतेसम्म राति १० बजेदेखि बिहान ४ बजेसम्म अत्यावश्यक सेवा बाहेकका सबै सवारी साधनहरू सञ्चालनमा रोक लगाइएको हो।

यस अवधिमा एम्बुलेन्स, दमकल, सुरक्षा निकायका सवारीसाधन लगायत अत्यावश्यक सेवामा संलग्न सवारीलाई भने आवागमनमा रोक नलगाइने प्रशासनले स्पष्ट पारेको छ। अन्य निजी तथा सार्वजनिक सवारीसाधनलाई भने तोकिएको समयमा यात्रा नगर्न अनुरोध गरिएको छ।