संसदमा सरकारका चार नयाँ विधेयक दर्ता

काठमाडौं । सरकारले संघीय संसद्मा चारवटा महत्वपूर्ण विधेयक दर्ता गरेको छ। स्वास्थ्य, सहकारी, सम्पत्ति शुद्धीकरण तथा सार्वजनिक खरिद व्यवस्थासँग सम्बन्धित कानुनलाई समयानुकूल बनाउन उद्देश्य राख्दै सरकारले नयाँ संशोधन विधेयक संसद् सचिवालयमा दर्ता गरेको हो।

गत शुक्रबार सरकारका तर्फबाट पेस गरिएका यी विधेयक संसद् सचिवालयले दर्ता गरी आफ्नो आधिकारिक वेबसाइटमार्फत सार्वजनिक गरेको छ। दर्ता भएका विधेयकहरूमा स्वास्थ्य विज्ञान प्रतिष्ठानसम्बन्धी केही ऐनलाई संशोधन गर्ने विधेयक, सहकारी (पहिलो संशोधन) विधेयक, सम्पत्ति शुद्धीकरणसम्बन्धी (तेस्रो संशोधन) विधेयक तथा सार्वजनिक खरिद (दोस्रो संशोधन) विधेयक रहेका छन्।

सरकारले स्वास्थ्य क्षेत्रको प्रभावकारी व्यवस्थापन, सहकारी क्षेत्रमा देखिएका समस्या समाधान, वित्तीय अपराध तथा अवैध सम्पत्ति नियन्त्रणलाई थप सुदृढ बनाउने र सार्वजनिक खरिद प्रक्रियालाई पारदर्शी तथा व्यवस्थित बनाउने उद्देश्यले यी विधेयक अघि बढाएको जनाएको छ।

सहकारी क्षेत्रसँग सम्बन्धित विधेयकलाई पछिल्लो समय सहकारी संस्थामा देखिएका अनियमितता, बचतकर्ताको रकम अपचलन तथा नियामक संरचनालाई थप प्रभावकारी बनाउने प्रयासका रूपमा हेरिएको छ। त्यस्तै सम्पत्ति शुद्धीकरणसम्बन्धी संशोधनले अन्तर्राष्ट्रिय मापदण्डअनुसार कानुनी व्यवस्था अद्यावधिक गर्ने अपेक्षा गरिएको छ।

सार्वजनिक खरिद ऐन संशोधनमार्फत विकास आयोजना कार्यान्वयनमा देखिएका कानुनी तथा प्रक्रियागत जटिलता हटाउने र खरिद प्रक्रियालाई छिटो, पारदर्शी तथा प्रतिस्पर्धात्मक बनाउने सरकारको लक्ष्य रहेको बताइएको छ। स्वास्थ्य विज्ञान प्रतिष्ठानसम्बन्धी संशोधनले चिकित्सा शिक्षा तथा स्वास्थ्य सेवाको गुणस्तर अभिवृद्धिमा सहयोग पुग्ने विश्वास गरिएको छ।

संसद्मा दर्ता भएका यी विधेयक अब सम्बन्धित समितिमा छलफलका लागि पठाइनेछन्। समितिमा आवश्यक अध्ययन तथा परिमार्जनपछि विधेयकहरू प्रतिनिधिसभा र राष्ट्रियसभाबाट पारित भई कानुनका रूपमा कार्यान्वयनमा आउने प्रक्रिया अघि बढ्नेछ।