सामुदायिक रेडियोको भूमिका विश्वस्तरमै अध्ययन र अनुकरणको विषय बनेको छ : राष्ट्रपति

काठमाडौँ, १० भदौः राष्ट्रपति रामचन्द्र पौडेलले सामाजिक सद्भाव, राष्ट्रिय एकता, मेलमिलाप र समावेशी लोकतन्त्रको प्रवद्र्धनमा सामुदायिक रेडियोले निर्वाह गरेको भूमिका नेपालमा मात्र नभई विश्वस्तरमै अध्ययनको विषय बनेको बताउनुभएको छ ।

राष्ट्रपति पौडेलले एसिया प्रशान्त प्रसारण विकास संस्था एवं सामुदायिक रेडियो प्रसारक सङ्घका पदाधिकारीसँग बुधबार शीतल निवासमा भएको भेटमा उहाँले सामुदायिक रेडियो विभिन्न समुदायको भाषा र संस्कृति संरक्षणका साथै नागरिकलाई शिक्षा, सूचना र मनोरञ्जन गराउने सशक्त माध्यम बनेको वास्तविकता सुनाउनुभयो ।

स्थापनाकालदेखि नै नेपालका सामुदायिक रेडियोले राजनीतिक, सामाजिक तथा सांस्कृतिक परिवर्तनका विभिन्न चरणमा महत्वपूर्ण भूमिका निर्वाह गर्दै आएका बताउँदै राष्ट्रपतिले भन्नुभयो,“नेपालको बहुभाषिक, बहुसांस्कृतिक र विविधतापूर्ण समाजको प्रतिनिधित्व गर्नुका साथै लोपोन्मुख भाषा तथा संस्कृतिको संरक्षण र प्रवद्र्धनमा महत्वपूर्ण योगदान पु¥याएको छ ।”

वर्तमान युगमा समाचार मोबाइल फोनमा छ, पडकास्टमा छ, सामाजिक सञ्जालमा छ, डिजिटल प्लेटफर्ममा छ र कृत्रिम बौद्धिकताले तयार पार्ने तथा वितरण गर्ने नयाँ माध्यमहरूमासमेत पुगिरहेको राष्ट्रपतिको कथन थियो ।