भाद्र ११, २०८३ बिहिबार
August 27, 2026
युग खबर
२०८३ भाद्र ११, बिहिबार
काठमाडौँ । कर्णाली प्रदेशमा नेपाली काँग्रेसका प्रदेश सभा सदस्यहरूले भोटेकोशी बाढीपीडितलाई रु. दुई लाख २५ हजार सहयोग गर्ने भएका छन् ।
सुर्खेतको वीरेन्द्रनगरमा आज बसेको नेपाली काँग्रेस कर्णाली प्रदेश सभा संसदीय दलको बैठकले बाढीपीडितको राहत, उद्धार तथा पुन:स्थापनाका लागि उक्त रकम सहयोग गर्ने निर्णय गरेको हो ।
बैठकमा कर्णाली प्रदेश सभामा निर्वाचित काँग्रेसका १५ कर्णाली प्रदेश सभा सदस्यले प्रधानमन्त्री दैवी प्रकोप उद्धार कोषमा जनही रु. १५ हजार सहयोग गर्ने निर्णय भएको सो दलका नेता जीवनबहादुर शाहीले जानकारी दिए।
बाढीबाट भएको जनधनप्रति गहिरो दुःख व्यक्त गर्दै उनले बाढीमा परी मृत्यु हुने सम्पूर्ण मृतकप्रति भावपूर्ण श्रद्धाञ्जली अर्पण गर्दै घटनाका घाइतेको शीघ्र स्वास्थ्य लाभको कामना गरेका छन् ।
घाइतेको उपचारको प्रबन्ध मिलाउन, बेपत्ता भएकाको खोजी, पीडितको राहत, उद्धार र पुन:स्थापनामा विशेष प्राथमिकताका साथ जुट्न नेपाल सरकारलगायतका सम्बद्ध सम्पूर्ण सरोकारवाला पक्षसँग अपिल गरिएको नेता शाहीले बताए।
युगखबर अनलाइनमा प्रकाशित कुनै सामग्रीबारे कुनै गुनासो, सूचना तथा सुझाव भए हामीलाई [email protected] मा पठाउनु होला । धन्यवाद ।
प्रतिक्रिया