एआईबाट राष्ट्रिय सुरक्षामा जोखिम : चिनियाँ गुप्तचर सुरक्षामन्त्री

बेइजिङ। कृत्रिम बुद्धिमत्ता (एआई) ले देशको राष्ट्रिय सुरक्षालाई खतरामा पारेको चीनका गुप्तचर संस्थाका प्रमुखले चेतावनी दिनुभएको छ ।

विदेशी शक्तिहरूले यस प्रविधिलाई सामाजिक व्यवस्थामाथि खतरा पार्न प्रयोग गर्न सक्ने उहाँले सोमबार बताउनुभएको छ ।

गुप्तचर सेवा तथा सुरक्षा मन्त्री चेन यिसिनले आइतबार अनलाइन प्रकाशित लेखमा लेख्नुभएको छ, “‘प्रतिद्वन्द्वी शक्ति’ ले जेनेरेटिभ एआई प्रविधिहरूको दुरुपयोग गरी ‘राजनीतिक अफवाहहरू फैलाउने र हानिकारक जानकारी फैलाउने’ काम गरिरहेका छन् ।”

“उनीहरूले चीनविरुद्ध सार्वजनिक मत युद्ध र संज्ञानात्मक युद्ध सुरु गर्छन्, जसले हाम्रो राजनीतिक सुरक्षा, संस्थागत सुरक्षा र वैचारिक सुरक्षालाई प्रत्यक्ष रूपमा खतरामा पार्छ,” उहाँले भन्नुभयो ।

यो चेतावनी चिनियाँ नेता सी जिनपिङ यस महिना वाशिङ्गटनमा अमेरिकी राष्ट्रपति डोनाल्ड ट्रम्पसँग भेटघाट गर्न लागेका बेला आएको हो । प्रविधिको बढी निगरानीका लागि आवाज उठिरहेका कारण एआई प्रशासन र सुरक्षा उनीहरूको छलफलको हिस्सा हुने अपेक्षा गरिएको छ ।

अमेरिकी प्रविधि अधिकारीहरूले पनि एआईको प्रगतिलाई सुस्त बनाउनुपर्ने आह्वान गरेका छन् ।

सुपरइन्टेलिजेन्ट कम्प्युटर प्रणालीहरूको जोखिमबारे चिन्ता बढिरहेका समय एन्थ्रोपिकका कार्यकारी प्रमुख डारियो अमोदेईले पनि शनिबार एआई प्रविधि विकासको ‘लापरवाहपूर्ण’ गतिबारे चेतावनी दिनुभएको थियो ।

ओपन एआईका लगानीकर्ता स्याम अल्टम्यानले अमोदेईको मूल्याङ्कनसँग सहमति जनाउनुभएको छ।

चेनले भन्नुभयो, “एआई अहिले ‘विश्वव्यापी प्रविधि प्रतिस्पर्धाको मुख्य युद्धभूमि र प्रमुख शक्तिहरूबीच रणनीतिक प्रतिद्वन्द्विताको नयाँ मार्ग’ बनेको छ ।

उहाँले भन्नुभयो, “अस्तित्वसम्बन्धी जोखिम वा प्रविधि प्रगतिमा ब्रेक लगाउने कुरा उल्लेख गर्नुभएन तर एन्थ्रोपिकको क्लाउड मिथोस र ओपन एआईको च्याटजीपीटी (५.५साइबर) लाई उनीहरूको उन्नत ह्याकिङ क्षमताले चीनको महत्वपूर्ण सूचना पूर्वाधारमा गम्भीर जोखिम निम्त्याउन सक्छ।”

चेनले भन्नुभयो, “विदेशी खुफिया एजेन्सीहरूले वेब क्रलर, डाटा माइनिङ र प्रोफाइलिङ विश्लेषण जस्ता प्रविधिहरू गहिरो रूपमा प्रयोग गरी प्रमुख राष्ट्रिय डाटा, व्यापारिक गोप्य जानकारी र नागरिकहरूको व्यक्तिगत गोपनीयता जस्ता संवेदनशील जानकारी व्यापक रूपमा सङ्कलन र प्राप्त गरिरहेका छन् ।”

“अमेरिका–इरान युद्धले पनि सैन्य क्षेत्रमा एआईको प्रमुख भूमिका देखाएको छ, जहाँ राम्रो प्रविधिले युद्धमैदानमा फाइदा दिने पुष्टि भएको छ,” उहाँले भन्नुभयो ।

चेनले भन्नुभयो, “चीनले एआई मोडेलहरू तालिम दिन अत्यावश्यक उन्नत कम्प्युटर चिपहरू समावेश मुख्य प्रविधिहरूको स्वतन्त्र नियन्त्रण सुनिश्चित गर्नुपर्छ ।” (रासस/एएफपी)