क्यान्सर अस्पतालको कार्यकारी निर्देशकमा दोस्रो पटक डा आचार्य

चितवन, २६ असोजः यहाँको बिपी कोइराला मेमोरियल क्यान्सर अस्पतालको कार्यकारी निर्देशकको पदमा पुनः डा विजयचन्द्र आचार्य चयन हुनुभएको छ । विसं २०७४ वैशाख २४ गतेदेखि तीन वर्ष कार्यकारी निर्देशक हुनुभएको थियो ।

अस्पताल सञ्चालक समितिको शुक्रबार साँझ बसेको बैठकले डा आचार्यलाई कार्यकारी निर्देशक पदमा नियुक्त गर्ने निर्णय गरेको हो । अस्पतालका सूचना अधिकारी गिरिनारायण महतोका अनुसार आचार्यले आज स्वास्थ्य तथा खाद्य स्वच्छता मन्त्रीको उपस्थितिमा अस्पतालका अध्यक्ष डा योगेन्द्रप्रसाद सिंहबाट सफत ग्रहण गरेर कार्यभार सम्हाल्ने तालिका रहेको छ ।

अस्पतालको कार्यकारी निर्देशक पदका लागि भएको खुला विज्ञापनमा आवदेन दिएका सात जनामध्ये छनोट सिफारिस समितिले दिएको सिफारिसका आधारमा डा आचार्यलाई चयन गरिएको हो ।

डा आचार्यसँगै डा अजयकुमार झा, डा उमेश नेपाल, डा कृष्णसागर शर्मा, डा गुरुशरण साह, डा प्रदीप थापा र डा रञ्जन भक्त भण्डारी अन्तर्वार्ताका लागि छनोट हुनुभएको थियो । आचार्य सोही अस्पतालमा कार्यरत चिकित्सक हुनुहुन्छ । उहाँ अस्पतालको महिला क्यान्सर रोग विशेषज्ञ (गाइनो अङ्कोलोजिष्ट) हुनुहुन्छ । विसं २०५८ माघ १४ गते मेडिकल अधिकृतका रुपमा आचार्यले अस्पतालमा काम सुरु गर्नुभएको हो ।

गत वैशाखमा अध्यादेशमार्फत अस्पतालका कार्यकारी निर्देशक डा शिवजी पौडेल पदबाट हटेपछि निमित्तका रुपमा डा उमेश नेपालले अस्पतालमा कार्यकारी निर्देशकको जिम्मेवारी सम्हाल्दै आउनुभएको थियो ।