राष्ट्रिय सभाको विधायन व्यवस्थापन समितिबाट दुई उपसमितिका प्रतिवेदन सर्वसम्मतिले पारित

काठमाडौँ । राष्ट्रिय सभाको विधायन व्यवस्थापन समितिले ऐन कार्यान्वयन मापन र विधायिकी अन्तरसम्बन्धसम्बन्धी दुई उपसमितिका प्रतिवेदन सर्वसम्मतिले पारित गरेको छ।

मंगलबार बसेको समितिको बैठकले ‘ऐन कार्यान्वयन मापन अध्ययन सिफारिस उपसमिति’ र ‘विधायिकी अन्तरसम्बन्ध अध्ययन सिफारिस उपसमिति’का प्रतिवेदन पारित गरेको हो।

डा. अञ्जान शाक्य संयोजक रहेको ऐन कार्यान्वयन मापनसम्बन्धी उपसमितिले तयार पारेको ७८ पृष्ठको प्रतिवेदनमा अस्ट्रेलिया, जर्मनी, जापान, बेलायत, भारतलगायत विभिन्न देशका कानुन कार्यान्वयनसम्बन्धी अभ्यास समेटिएका छन्।

शाक्यले कानुन निर्माणपछि त्यसको कार्यान्वयन, उद्देश्य प्राप्ति र नागरिकको जीवनमा परेको प्रभावको अध्ययन गर्नु पनि संसद्को महत्वपूर्ण जिम्मेवारी भएको बताइन्।

बैठकमा सांसदहरूले प्रतिवेदनलाई महत्वपूर्ण र अनुसन्धानका लागि उपयोगी दस्ताबेजका रूपमा लिँदै यसको प्रशंसा गरेका थिए।