लकडाउन यता बैंक तथा वित्तीय संस्थाहरुमा १ खर्ब २७ अर्ब रुपैयाँ निक्षेप संकलन

काठमाडौं । लकडाउन यता बैंक तथा वित्तीय संस्थाहरुमा १ खर्ब २७ अर्ब रुपैयाँ निक्षेप संकलन भएको छ ।

क वर्गका वाणिज्य बैंक, ख वर्गका विकास बैंक र ग वर्गका फाइनान्स कम्पनीले लकडाउन शुरु भएदेखि २४ जेठसम्ममा १ खर्ब २७ अर्ब रुपैयाँ निक्षेप संकलन गरेको नेपाल राष्ट्र बैंकले बताएको छ ।

राष्ट्र बैंकको अपरिस्कृत तथ्यांक अनुसार लकडाउन शुरु भएको दिन ११ चैतमा क, ख र ग वर्गका यि संस्थाहरुमा ३५ खर्ब ९४ अर्ब रुपैयाँ निक्षेप थियो । २४ जेठसम्म आइपुग्दा यो बढेर ३७ खर्ब २१ अर्ब रुपैयाँ पुगेको राष्ट्र बैंकले बताएको छ ।

कर्जा लगानी अझै सुस्ताएको छ । २ महिना भन्दा लामो समय भएको लकडाउनमा जम्मा ११ अर्ब रुपैयाँमात्रै ऋण लगानी भएको राष्ट्र बैंकका प्रवक्ता डा. गुणाकर भट्टले जानकारी दिएका छन ।

११ चैतसम्ममा बैंक तथा वित्तीय संस्थाहरुको ३२ खर्ब १८ अर्ब रुपैयाँ लगानीमा रहेको थियो । त्यो बढेर २४ जेठमा ३२ खर्ब २९ अर्ब रुपैयाँमात्रै पुगेको प्रवक्ता भट्टले बताएका छन ।

लकडाउनमा आर्थिक क्रियाकलापहरु ठप्प भएका कारण बैंकहरुमा कर्जा लगानी कम भएको हो ।

पछिल्लो समय बैंकमा कर्जा लिन आउनेको संख्या अत्यन्तै न्यून रहेको बैंकर्स संघका कार्यकारी सदस्य तथा सनराइज बैंकका सीईओ जनकराज पौड्याल बताउछन् ।

बैंकमा पछिल्लो समय भीड लागेको बताएका उनले बैंकमा आएका अधिकांश निक्षेप जम्मा गर्नेहरु रहेको उनले बताएका छन ।