दशैका लागि बाटो बनाउँदै बेलकोटगढी नगरपालिका

नुवाकोट । नुवाकोट जिल्लाको बेलकोटगढी नगरपालिकाले दशैका लागि स्थानीय बाटोहरु मर्मत तथा सभा गर्न थालेको छ । नगर कार्यपालिकाको बैठकले दशैमा स्थानीय सडकहरु सफा गर्ने भन्दै प्रत्येक वडालाई ७ लाख दिने निर्णय गरेसँगै वडा कार्यालयहरुले धमाधम बटो सफा गर्न थालेका छन् ।

सात लाख मध्ये पाँच लाख बाटो सफा गर्नेका लागि खर्च गर्नुपर्नेछ भने दुई लाखको हिमपाईप खरिद गर्नुपर्ने छ । हिमपाईप नगरपालिकाले नै खरिद गरेर वडा कार्यालयलाई हस्तान्तरण गर्ने निर्णय भएको नगर प्रमुख राजेन्द्ररमण खनालले युग खबरलाई जानकारी दिनुभयो । यस्तै बाटो सफा गर्नका लागि पनि डोजरका लागि टेन्डर आह्वान गरिएको थियो ।

नगरपालिकाले टेण्डर आह्वान गरे अनुसार ४१ सय र २१ सय मा सम्झौता भएको छ । ठुलो अर्थात टु ट्वान्टी डोजरलाई ४१ सय भुक्तानी गरिने छ भने सानो डोजरका लागि २१ सय भुक्तानी गरिने निर्णय भएको वडा नं५ का वडा अध्यक्ष अनन्त नेपालले जानकारी दिनुभयो । उहाका अनुसार जोडरको सञ्चालनका लागि मेन प्याईन्टमा जनप्रतिनिधिको रोवरमा नम्बर चेक गरेपछि अन्त्यमा सोही नम्बरको आधारमा भुक्तानी गरिने छ ।

स्थानीय बाटोहरु बर्खाका समयमा पानीले बगाएर गाडीहरु चल्न नसक्ने भएपछि नगरपालिकालेदशैमा सर्वसाधारणको आवातजावतलाई ध्यानमा राखेर बाटो सफा गर्ने निर्णय गरेको जनाइएको छ । यसैबीच नगरपालिकाको यो निर्णयमा कतिपय वडा अध्यक्षले नोट अफ डिसेन्ट लेख्ने भन्दै नगर प्रमुख समक्ष असहमति प्रकट गरेपनि मेयर खनालले निर्णय गर्ने अडान लिएपछि वडा अध्यक्षहरुले सहि गरेका थिए ।

नगर प्रमुख खनालले आफ्नो पार्टीका वडा अध्यक्षहरुको असहमतिका बीच निर्णय गरेपछि नेकपामा नगर प्रमुखका विषयलाई लिएर बहस सुरु भएको एक वडा अध्यक्षले युग खबरलाई बताए । उनका अनुसार नगर प्रमुखको विरोधमा समानान्तर कमिटि बनाउने चेतावनी समेत दिइएको छ । स्मरणीय छ सो नगरपालिकामा निर्वाचित केही वडा अध्यक्षहरुे आफैले डोजर किनेर गाउँमा सञ्चालन गरिरहेका छन् । नगरपालिकाको यो निर्णयले भ्रष्टाचार कम हुने भएकाले निर्णयको बिरोध गर्नुको तुक नभएको वडा नं ५ का वडा अध्यक्ष अन्नत नेपालले बताउनुभयो । उहाले भन्नुभयो–हिजो एउटा डोजरको ५ हजारसम्मको बिल बनेको अवस्था थियो नगरपालिको निर्णयले त्यस्तो गलत प्रवृतिको अन्त्य भएको छ ।