नेपालमा थप १ सय ४४ जनामा कोरोना संक्रमण पुष्टिः डिस्चार्ज हुनेको संख्या १० हजार २ सय ९४ पुग्यो

काठमाण्डौः नेपालमा सोमवार थप १ सय ४४ जनामा कोरोना संक्रमण पुष्टि भएको छ ।

योसँगै नेपालमा कोरोना संक्रमितको संख्या १६ हजार ९ सय ४५ पुगेको छ । स्वास्थ्य तथा जनसंख्या मन्त्रालयले सोमवार आयोजना गरेको नियमित पत्रकार सम्मेलनमा दिइएको जानकारी अनुसार विभिन्न जिल्लामा उक्त संख्याका व्यक्तिमा कोरोना संक्रमण पुष्टि भएको हो ।

हालसम्म कुल संक्रमितको ६० दशमलव ७ प्रतिशत निको भएका छन् ।  मन्त्रालयका प्रवक्ता डा जागेश्वर गौतमका अनुसार हालसम्म कुल पीसीआर परीक्षण २ लाख ८९ हजार ३७१ पुगेको छ भने कुल डिस्चार्ज हुनेको संख्या १० हजार २९४ पुगेको छ ।

देशका  विभिन्न भागका क्वारेन्टाइनमा २३ हजार ४७० जना रहेका छन् । त्यस्तै आईसोलेशनमा ६ हजार ६१३ जना रहेका छन् ।यस्तै पछिल्लो २४ घण्टामा ५ हजार ८५६ जनाको पीसीआर परीक्षण गरिएको छ ।