वरिष्ठ कलाकार सुनिल थापाको निधन

काठमाडौँ। नेपाली चलचित्र क्षेत्रका वरिष्ठ कलाकार सुनिल थापाको निधन भएको छ। चलचित्रमा ‘राते काँइला’ नामले परिचित थापाको शनिबार बिहान काठमाडौँको थापाथलीस्थित नर्भिक अन्तर्राष्ट्रिय अस्पतालमा उपचारका क्रममा निधन भएको हो।

शंखमुलस्थित एक अपार्टमेन्टमा बसोबास गर्दै आएका थापा लामो समयदेखि स्वास्थ्य समस्याबाट पीडित रहनुभएको बताइएको छ। उहाँको निधनको खबरसँगै नेपाली चलचित्र क्षेत्र शोकमा डुबेको छ।

सुनिल थापा नेपाली चलचित्रमा खलनायक भूमिकाका लागि विशेष रूपमा चर्चित हुनुहुन्थ्यो। उहाँले नेपालीसँगै केही भारतीय चलचित्रहरूमा समेत अभिनय गर्नुभएको थियो। फरक शैलीको अभिनय, कडा संवाद र प्रभावशाली उपस्थितिका कारण उहाँ दर्शकमाझ ‘राते काँइला’को नामले लोकप्रिय हुनुहुन्थ्यो।

थापाले दशकौँसम्म नेपाली फिल्म उद्योगमा योगदान दिँदै थुप्रै स्मरणीय चलचित्रमा अभिनय गर्नुभएको थियो। उहाँको अभिनय यात्राले नेपाली चलचित्रमा खलनायक चरित्रलाई छुट्टै उचाइ दिएको मानिन्छ।

उहाँको निधनप्रति चलचित्रकर्मी, कलाकार, निर्देशक तथा शुभेच्छुकहरूले सामाजिक सञ्जालमार्फत श्रद्धाञ्जली व्यक्त गरिरहेका छन्। थापाको अन्तिम संस्कार र पार्थिव शरीर व्यवस्थापनबारे परिवारले थप जानकारी दिने बताइएको छ।

स्व. सुनिल थापाको निधनले नेपाली चलचित्र क्षेत्रले एक अनुभवी र प्रभावशाली कलाकार गुमाएको छ।