रास्वपा सचिवालय बैठक पार्टी मुख्यालय वनस्थलीमा शुरु

काठमाडौं । सत्तारुढ राष्ट्रिय स्वतन्त्र पार्टी (रास्वपा) को सचिवालय बैठक आज पार्टी केन्द्रीय कार्यालय वनस्थलीमा जारी छ। पार्टी सभापति रवि लामिछानेको आह्वानमा बसेको बैठकमा आगामी प्रथम महाधिवेशनको तयारी, विधान संशोधन, निर्वाचन कार्यविधि तथा संगठनात्मक विषयमा विस्तृत छलफल भइरहेको छ।

पार्टी महासचिव कविन्द्र बुर्लाकोटीका अनुसार बैठकले महाधिवेशनलाई व्यवस्थित, पारदर्शी र सफल बनाउन आवश्यक नीतिगत तथा व्यवस्थापकीय निर्णयहरू गर्ने अपेक्षा गरिएको छ।

रास्वपाले आगामी असार ७ देखि ९ गतेसम्म चितवनमा आफ्नो प्रथम महाधिवेशन आयोजना गर्ने तयारी गरिरहेको छ। महाधिवेशनमार्फत पार्टीको भावी नेतृत्व चयन, संगठन सुदृढीकरण तथा नीतिगत दस्तावेज पारित गर्ने लक्ष्य राखिएको छ।

बैठकमा प्रदेश अधिवेशनहरूको समीक्षा गर्दै विभिन्न प्रदेशबाट प्राप्त सुझाव र अनुभवबारे समेत छलफल भइरहेको जनाइएको छ। त्यस्तै, महाधिवेशनमा अपनाइने निर्वाचन प्रक्रिया, प्रतिनिधि व्यवस्थापन, उम्मेदवारी दर्ता तथा मतदान प्रणालीसम्बन्धी विषयमा पनि सचिवालय सदस्यहरूबीच विचार-विमर्श भइरहेको छ।

यसैगरी, पार्टी विधान संशोधन मस्यौदामाथि छलफल गरी समयानुकूल र संगठनको आवश्यकताअनुसार सुधारका प्रस्तावहरूलाई अन्तिम रूप दिने तयारी गरिएको छ। पार्टी समायोजनसम्बन्धी प्रगति, नयाँ सदस्यहरूको व्यवस्थापन तथा संगठन विस्तारका विषय पनि बैठकको एजेन्डामा समावेश छन्।