चिया निर्यातमा देखिएको समस्या समाधान गर्न नारायणकाजी श्रेष्ठको सरकारसँग आग्रह

काठमाडौं । नेकपाका नेता नारायणकाजी श्रेष्ठले नेपाली चिया उद्योगमा देखिएको संकट समाधानका लागि सरकारसँग तत्काल पहल गर्न आग्रह गर्नुभएको छ। भारतले अवलम्बन गरेको नीतिका कारण नेपाली चिया निर्यात प्रभावित भई उद्योगहरू बन्द हुने अवस्था सिर्जना भएको भन्दै उहाँले सरकारको गम्भीर ध्यानाकर्षण गराउनुभएको हो।

सामाजिक सञ्जालमार्फत धारणा सार्वजनिक गर्दै नेता श्रेष्ठले भारतको नीतिका कारण नेपाली चिया उद्योग गम्भीर संकटमा परेको उल्लेख गर्नुभयो। उहाँले समस्या समाधानका लागि तत्काल भारत सरकारसँग कूटनीतिक तथा सरकारी तहमा वार्ता गरी सकारात्मक निष्कर्ष निकाल्न सरकारसँग जोडदार माग गर्नुभएको छ।

उहाँले चिया उद्योगमा देखिएको वर्तमान संकटले नेपालको अर्थतन्त्र, रोजगारी, कृषिमा आधारित उद्योग तथा निर्यात व्यापारमा ठूलो असर पार्ने चेतावनी दिनुभयो। चिया क्षेत्रसँग प्रत्यक्ष तथा अप्रत्यक्ष रूपमा जोडिएका हजारौँ किसान, मजदुर र व्यवसायी प्रभावित हुने भएकाले सरकारले यस विषयलाई उच्च प्राथमिकतामा राख्नुपर्ने उहाँको भनाइ छ।

नेता श्रेष्ठले नेपाली चियाको निर्यातमा देखिएको अवरोध हटाउन र उद्योगलाई संरक्षण गर्न भारतीय पक्षसँग शीघ्र संवाद सुरु गर्न आवश्यक रहेको बताउनुभयो। उहाँले समस्या समाधानमा ढिलाइ भए चिया उद्योग थप संकटमा फस्ने र त्यसको असर राष्ट्रिय अर्थतन्त्रमा समेत पर्ने उल्लेख गर्नुभयो।

हाल भारतले अवलम्बन गरेको नीतिका कारण नेपाली चियाको निर्यात प्रक्रियामा समस्या उत्पन्न भएको उद्योगी व्यवसायीहरूले बताउँदै आएका छन्। यसले उत्पादन, बिक्री तथा निर्यातमा प्रत्यक्ष प्रभाव पार्दा चिया उद्योगमा अन्योल र चिन्ता बढेको छ।

नेता श्रेष्ठले सरकारलाई चिया उद्योगको संरक्षण, किसानको हित र निर्यात व्यापारको निरन्तरताका लागि तत्काल कूटनीतिक पहल थाल्न आग्रह गर्नुभएको छ।