कांग्रेसमा तीन धार

ललितपुर, साउन १८ गते । नेपाली कांग्रेसको २०८२ पुसमा सम्पन्न दोस्रो विशेष महाधिवेशनपछि उत्पन्न विवाद उत्कर्षमा पुगेको छ । नेतृत्व दोस्रो पुस्तामा गएपछि आरम्भ भएको मतभेदले कांग्रेस तीन समूहमा विभाजित भएको हो । सभापति गगनकुमार थापासहितका शीर्ष नेताले पूर्वसभापति शेरबहादुर देउवा समूहको नेतृत्व गरिरहेका पूर्वकार्यवाहक सभापति पूर्णबहादुर खड्का, नेता डा. शेखर कोइरालालगायतसँग संवाद गरे पनि निष्कर्ष आएको छैन ।

सभापति थापा सभापति भएपछि पहिलो पुस्ताका विशेषतः ७० वर्षमाथिका नेतालाई नेतृत्व स्वीकार गर्न गाह्रो भएको कांग्रेसकै नेता बताउँछन् । १५ औँ महाधिवेशनअघि १४ औँ महाधिवेशनबाट निर्वाचित सबै पदाधिकारी र केन्द्रीय सदस्यलाई केन्द्रीय कार्यसमितिमा गाभ्नुपर्ने नेता खड्का समूहको माग संस्थापन पक्षले अस्वीकार गरेको छ । उक्त समूहले आफ्ना माग पूरा नहुने भएपछि साउन २९ गतेदेखि राष्ट्रिय भेलाको आयोजना गरेको छ ।

यसैबिच कांग्रेस केन्द्रीय कार्यसमितिको बैठक साउन २४ गतेका लागि आह्वान गरिएको छ । महामन्त्री प्रदीप पौडेलका अनुसार पार्टीको आन्तरिक एकता, साङ्गठनिक सुदृढीकरण र नेता खड्कासहितको समूहले राष्ट्रिय भेला आयोजना गरेको सन्दर्भमा बैठकमा गहन विमर्श हुने छ ।

नेता खड्काको समूहले पूर्वमहामन्त्री डा. शशाङ्क कोइराला नेतृत्वमा राष्ट्रिय भेला आयोजक समिति घोषणा गरेपछि संविधान सभा सदस्य एवं नेता रञ्जित कर्णको संयोजकत्वमा पार्टी एकताका लागि तेस्रो धारले अभियान थालेको छ । उक्त समूहमा नेता नैनसिंह महर, राजेन्द्र तिवारी, भवानी देवकोटा, मनहरि श्रेष्ठ, पुष्प शाहीलगायत हुनुहुन्छ । नेता कर्णले कांग्रेसलाई सुदृढ बनाउन ‘देश र कांग्रेस जोड्ने अभियान’ थालनी गरिएको र साउन २० गते राष्ट्रिय एकता भेलाको आयोजना गरिएको बताउनुभयो ।  गोरखापत्र दैनिकबाट