रास्वपाका नेता कोइरालासहित ५५ जना जुवाखालबाट पक्राउ

सुर्खेत । राष्ट्रिय स्वतन्त्र पार्टी (रास्वपा) दैलेख क्षेत्र नम्बर १ का सभापति राजेश शर्मा कोइरालासहित ५५ जना जुवातास खेलिरहेको अवस्थामा सुर्खेतमा पक्राउ परेका छन्।

जिल्ला प्रहरी कार्यालय सुर्खेतका अनुसार विभिन्न स्थानमा हारजित हुने गरी नगद रकम राखेर जुवातास खेलिरहेको अवस्थामा उनीहरूलाई पक्राउ गरिएको हो। पक्राउ परेका कोइराला र अन्य व्यक्तिहरूको साथबाट नेपाली तथा भारतीय रुपैयाँ गरी १२ लाख ५३ हजार ८४५ रुपैयाँ नगद र ५३ गड्डी तास बरामद गरिएको प्रहरीले जनाएको छ।

जिल्ला प्रहरी कार्यालय सुर्खेतले सार्वजनिक गरेको प्रेस विज्ञप्तिअनुसार २०८३ साल कात्तिक २२ गते जुवातास खेलिरहेको भन्ने गोप्य सूचना प्राप्त भएपछि प्रहरीले विभिन्न स्थानमा छापा मारेको थियो।

छापा मार्ने क्रममा कर्णाली प्रदेश प्रहरी कार्यालय सुर्खेत, प्रदेश प्रहरी गण सुर्खेत, जिल्ला प्रहरी कार्यालय सुर्खेत तथा प्रहरी चौकी बाबियाचौरबाट खटिएको संयुक्त प्रहरी टोलीले जुवातास खेलिरहेको अवस्थामा ५५ जनालाई नियन्त्रणमा लिएको हो।

प्रहरीले घटनास्थलबाट जुवा खेल्न प्रयोग गरिएका ५३ गड्डी तास बरामद गरेको छ। त्यस्तै, जुवामा हारजितका लागि प्रयोग भइरहेको नेपाली तथा भारतीय रुपैयाँसमेत बरामद गरिएको जिल्ला प्रहरी कार्यालय सुर्खेतले जनाएको छ।

पक्राउ पर्नेहरूमा सुर्खेतको वीरेन्द्रनगर नगरपालिका वडा नम्बर ६ लगायत विभिन्न स्थानमा बसोबास गर्ने व्यक्तिहरू रहेका छन्। प्रहरीको सार्वजनिक विवरणअनुसार पक्राउ परेकाहरू सुर्खेत, कैलाली, दैलेख तथा भारतको बिहारलगायत विभिन्न क्षेत्रका बासिन्दा हुन्।

पक्राउ परेका व्यक्तिहरूको उमेर १८ वर्षदेखि ७० वर्षसम्म रहेको प्रहरीले जनाएको छ। घटनामा संलग्न रहेको आरोपमा पक्राउ परेका व्यक्तिहरूको नाम, उमेर र ठेगानासमेत प्रहरीले सार्वजनिक गरेको छ।

जुवातास खेल्ने तथा खेलाउने गतिविधि नियन्त्रण गर्न प्रहरीले निगरानी र कारबाहीलाई तीव्र बनाएको जनाएको छ। बरामद नगद रकम र ताससहित पक्राउ परेका व्यक्तिहरूमाथि जुवा खेल्ने वा सट्टाबाजी गर्ने कसुरमा थप अनुसन्धान भइरहेको जिल्ला प्रहरी कार्यालय सुर्खेतले जनाएको छ।

रास्वपा दैलेख क्षेत्र नम्बर १ का सभापति राजेश शर्मा कोइरालासमेत पक्राउ परेको घटनाले राजनीतिक वृत्तमा चासो बढाएको छ।