नक्कली भुटानी शरणार्थी प्रकरण : टोपबहादुर रायमाझी जेलमुक्त

काठमाडौं । नक्कली भुटानी शरणार्थी प्रकरणमा दोषी ठहर भई कैद सजाय भोगिरहेका पूर्वउपप्रधानमन्त्री टोपबहादुर रायमाझी उमेरका आधारमा पाउने कैद छुट सुविधापछि जेलमुक्त भएका छन्।

६५ वर्ष उमेर पूरा भएपछि ज्येष्ठ नागरिकले पाउने कानुनी सुविधाअनुसार रायमाझी बिहीबार बिहान डिल्लीबजार कारागारबाट रिहा भएका हुन्। उनी बिहान करिब ७ बजे कारागारबाट बाहिरिएका थिए।

रायमाझीलाई लिन पुगेका लिला केसीका अनुसार बिहान ६ः४५ बजे कारागार पुगेको टोलीले ७ बजे उनलाई लिएर बाहिरिएको थियो। त्यसपछि उनी काठमाडौंको सातदोबाटोस्थित घर पुगेका छन्। केही दिन घरमै आराम गरेपछि गृहजिल्ला अर्घाखाँची जाने तयारी रहेको केसीले बताएका छन्।

रायमाझीको रिहाइ काठमाडौं जिल्ला अदालतको आदेश र संशोधित कैदीपुर्जीका आधारमा भएको हो। डिल्लीबजार कारागारका जेलर बाबुराम अर्यालका अनुसार तिहारअघि नै अदालतबाट रिहाइसम्बन्धी पत्र प्राप्त भएको थियो। सोही आधारमा बिहीबार उनलाई कारागारमुक्त गरिएको हो।

ज्येष्ठ नागरिकको उमेरका आधारमा कैद छुट सुविधा माग गर्दै रायमाझीले अदालतमा निवेदन दिएका थिए। निवेदनमाथि सुनुवाइ गर्दै अदालतले प्रचलित कानुनी व्यवस्थाअनुसार कैद छुट सुविधा प्रदान गर्ने निर्णय गरेपछि संशोधित कैदीपुर्जी जारी भएको थियो।

तत्कालीन नेकपा एमालेका सचिवसमेत रहेका रायमाझी नक्कली भुटानी शरणार्थी प्रकरणमा ठगी, संगठित अपराध, राज्यविरुद्धको कसुर र एकीकृत कसुरमा दोषी ठहर भएका थिए। काठमाडौं जिल्ला अदालतले ठगीमा दुई वर्ष कैद र २० हजार रुपैयाँ जरिवाना, संगठित अपराधमा तीन वर्ष कैद र ३० हजार रुपैयाँ जरिवाना, राज्यविरुद्धको कसुरमा एक वर्ष ६ महिना कैद र १५ हजार रुपैयाँ जरिवाना तथा एकीकृत कसुरतर्फ चार वर्ष कैद र ४० हजार रुपैयाँ जरिवाना तोकेको थियो।

उच्च राजनीतिक तहका व्यक्तिहरू समेत मुछिएको नक्कली भुटानी शरणार्थी प्रकरणमा रायमाझी पनि दोषी ठहर भएका थिए। उनको पछिल्लो रिहाइ भने अदालतबाट प्राप्त ज्येष्ठ नागरिकसम्बन्धी कानुनी सुविधाअन्तर्गत भएको हो।

कारागारबाट बाहिरिएपछि रायमाझीलाई परिवार तथा आफन्तले घरमै टीका र माला लगाएर स्वागत गरेका छन्।