पूर्वसांसद बर्मन बुढाको निधनप्रति अध्यक्ष प्रचण्डको समवेदना

काठमाण्डौंः पूर्वसांसद बर्मन बुढाको निधन भएको छ ।

बुढाको पाटन अस्पताल, ललितपुरमा उपचारका क्रममा बुधबार बिहान साँढे ४ बजे ९० वर्षको उमेरमा निधन भएको हो ।

नेपाल कम्युनिस्ट पार्टी (नेकपा)का अध्यक्ष पुष्पकमल दाहालले बुढाप्रति श्रद्धाञ्जली अर्पण गर्दै शोक सन्तप्त परिवारजन तथा आफन्तजनमा समवेदना प्रकट गर्नुभएको छ ।

‘नेपाली मुक्तिकामी आन्दोलनका अविचलित र अथक योद्धा कमरेड बुढाको विशेष गरी रोल्पाली जनताको मुक्तिकामी आन्दोलनमा ऐतिहासिक योगदान रहेको छ ।

सामन्तवाद विरोधी नेपाली जनताको मुक्तियुद्धमा उहाँ जहिले पनि अग्रमोर्चामा रहनुभयो,’ शोक बक्तव्यमा भनिएको छ, ‘उहाँको निधनले नेपाली मुक्तिकामी आन्दोलनले एक अभिभावक गुमाएको छ ।’