निर्वाचनपछि रणनीति पुनरावलोकनमा राष्ट्रिय मुक्ति पार्टी

काठमाडौं । राष्ट्रिय मुक्ति पार्टी नेपालको केन्द्रीय कार्यकारिणी समितिको बैठक दोस्रो दिन पनि जारी रहेको छ। हिजोबाट सुरु भएको बैठक आज पनि निरन्तर चलिरहेको पार्टी अध्यक्ष राजेन्द्र महतोले जानकारी दिएका छन्।

बैठकमा पार्टीको विगतको गतिविधिको समीक्षा, वर्तमान राजनीतिक परिस्थितिको मूल्याङ्कन तथा आगामी रणनीतिबारे विस्तृत छलफल भइरहेको बताइएको छ। पार्टी संगठनलाई सुदृढ बनाउने, जनाधार विस्तार गर्ने र भावी राजनीतिक दिशा तय गर्ने विषयलाई बैठकले प्राथमिकता दिएको अध्यक्ष महतोले उल्लेख गरे।

पछिल्लो प्रतिनिधिसभा निर्वाचनपछि मधेश केन्द्रित दलहरूको राजनीतिक स्थिति कमजोर देखिएपछि ती दलहरूबीच एकता र सहकार्यको चर्चा पुनः चुलिएको छ। सोही सन्दर्भमा राष्ट्रिय मुक्ति पार्टीभित्र पनि अन्य मधेश केन्द्रित शक्तिसँग सम्भावित एकता तथा नेतृत्व व्यवस्थापनबारे छलफल भइरहेको जनाइएको छ।

पार्टी स्रोतका अनुसार बैठकमा संगठन पुनर्संरचना, नेतृत्व हस्तान्तरणको सम्भावना, तथा भविष्यमा अपनाइने राजनीतिक रणनीतिबारे समेत विचार–विमर्श भइरहेको छ। यद्यपि यसबारे कुनै औपचारिक निर्णय भने भइसकेको छैन।