रास्वपा लमजुङमा सभापति चयन विवादित, केन्द्रीय आयोगमा उजुरी

काठमाडौं । राष्ट्रिय स्वतन्त्र पार्टी (रास्वपा) लमजुङ जिल्ला अधिवेशनमा भएको सभापति पदको निर्वाचन विवादमा परेको छ। सभापति पदका उम्मेदवारहरू हरिबहादुर धिताल, विजय रञ्जन पौडेल र नवराज पहाडीले निर्वाचन प्रक्रिया विधानविपरीत भएको दाबी गर्दै केन्द्रीय निर्वाचन आयोगमा उजुरी दिएका छन्। उनीहरूले सभापतिमा निर्वाचित घोषित अशोक सापकोटाको पद खारेज गरी पुनः निर्वाचन गराउन माग गरेका छन्।

उजुरीकर्ताहरूका अनुसार जेठ २४ गते सम्पन्न जिल्ला अधिवेशनमा सभापति पदका लागि पाँच जनाको उम्मेदवारी कायम रहेको थियो। पार्टी विधान २०७९ (तेस्रो संशोधनसहित) को धारा ३३ उपधारा १ (ख) अनुसार विजयी हुन कुल सदर मतको ५० प्रतिशतभन्दा बढी मत प्राप्त गर्नुपर्ने वा शीर्ष दुई उम्मेदवारबीच पुनः निर्वाचन हुनुपर्ने व्यवस्था रहेकोमा त्यसको पालना नभएको आरोप लगाइएको छ।

उनीहरूको दाबीअनुसार कुल १७४ सदर मतमध्ये ६९ मत अर्थात् ३९.६ प्रतिशत मत मात्र प्राप्त गरेका अशोक सापकोटालाई निर्वाचन समिति प्रमुख कृष्णकुमारी अधिकारी (अनिशा) ले विधानविपरीत जिल्ला सभापति घोषणा गरेकी हुन्। साथै, जेठ २५ गते पुनः निर्वाचन हुने जानकारी दिइए पनि अन्य उम्मेदवारको सहमति नलिई सापकोटालाई सभापति घोषणा गरी शपथसमेत खुवाइएको भन्दै उनीहरूले उक्त निर्णय बदर गरी पुनः निर्वाचन गराउन माग गरेका छन्।