रास्वपा गण्डकी सभापतिमा नवीन त्रिपाठी विजयी

काठमाण्डौं, जेठ ३० गते । राष्ट्रिय स्वतन्त्र पार्टी (रास्वपा)गण्डकी प्रदेशको प्रथम अधिवेशनबाट सभापतिमा नवीन त्रिपाठी निर्वाचित हुनुभएको छ । यसअघि महासचिव रहनुभएका त्रिपाठी आफ्ना तीन प्रतिस्पर्धीलाई पछि पार्दै सभापति चुनिनुभएको हो ।

त्रिपाठीले दुई सय ३४ मत पाउँदा उहाँका प्रतिस्पर्धी राजन गौतमले एक सय ८२ मत, माधव कँडेलले ११ मत र हरिबहादुर कार्कीले दुई मत पाउनुभएको छ । कार्कीले अन्तिम समयमा उम्मेदवारी फिर्ता लिनुभएको थियो । शुक्रबार राति ११ बजेतिर सुरु भएको मतदानको नतिजा शनिबार बिहान सार्वजनिक भएको हो ।

कास्कीको पोखरा महानगरपालिका वडा नम्बर २५ का त्रिपाठी निवर्तमान सभापति गौतमसहितलाई हराएर सभापति बन्नुभएको हो । गौतम नवलपरासी (बर्दघाट सुस्तापूर्व)को क्षेत्र नम्बर १ बाट निर्वाचित प्रतिनिधिसभा सदस्यसमेत हुनुहुन्छ । सभापतिका उम्मेदवार कँडेल अघिल्लो प्रतिनिधिसभा निर्वाचनमा कास्की क्षेत्र नम्बर २ बाट उम्मेदवार बनी उपविजेता बन्नुभएको थियो । कार्की भने अटेरी अभियान हुँदै रास्वपा प्रवेश गर्नुभएको हो ।

गण्डकी प्रदेश समिति सदस्यका लागि ५१ जनाले उम्मेद्वारी दिएका थिए । क्षेत्रगत प्रदेश सदस्यतर्फबाट बागलुङ १ का मीना शर्मा आचार्य, गोरखा १ बाट मनोज गुरुङ, गोरखा २ बाट बलबहादुर घले, लमजुङबाट विजय पराजुली, म्याग्दीबाट ताराबहादुर कार्की र तनहुँ १ बाट सूर्यमणि पौडेल निर्विरोध हुनुभएको थियो ।

प्रदेश समावेशी सदस्यमा खसआर्य महिलाबाट सीताकुमारी अर्याल, कृष्णकुमारी अधिकारी र राममाया बस्ताकोटी निर्विरोध बन्दा मुस्लिम महिलाबाट समिउन निशा, दलित महिलाबाट गीता विश्वकर्मा र अपाङ्गता भएका खसआर्यबाट यदुनाथ सिग्देलसमेत सर्वसम्मत चुनिनुभएको थियो । चार सदस्य सभापतिले मनोनयन गर्न पाउने व्यवस्था छ । गण्डकी प्रदेशको अधिवेशनमा ७ सय ८० प्रतिनिधि थिए ।