एमाले अध्यक्ष ओलीले गरे ‘जनसंगठन समन्वय संयन्त्र कार्यशाला’को उद्घाटन

भक्तपुर । नेपाल कम्युनिष्ट पार्टी (एमाले)का अध्यक्ष केपी शर्मा ओलीले आज भक्तपुरको नगरकोटमा नेकपा (एमाले) जनसंगठन समन्वय संयन्त्रले आयोजना गरेको दुई दिने ‘जनसंगठन समन्वय संयन्त्र कार्यशाला’ उद्घाटन गरेका छन् ।

चाँगुनारायण नगरपालिका–८ चरेलीस्थित रिसोर्टमा आयोजना गरेको कार्यशालाको उद्घाटन गर्दै उनले एमाले कमजोर भए देश कमजोर हुने बताए । अध्यक्ष ओलीले देश संकटमा गुज्रिँदै गएको अवस्थामा पार्टीलाई बलियो बनाएर अगाडि जान सके मात्रै देश बलियो हुने बताउँदै पार्टी कमजोर बनाउन खोज्ने तत्त्वहरूले यस्ता कुरालाई बुझ्नुपर्ने बताए ।

व्यक्तिगत स्वार्थ र दोषारोपणबाट माथि उठेर पार्टी र देशको हितका लागि सोच्नुपर्ने बेला आएको बताउँदै पार्टीलाई बलियो बनाउन जनसंगठन एक भएर अगाडि बढ्नुपर्नेमा जोड दिए ।

देश र जनताको हितमा सरकार लाग्नुपर्ने औँल्याउँदै उनले प्रतिपक्षले खबरदारी गरिरहने बताए । दुई दिने कार्यशालाले पार्टी र देशलाई बलियो बनाउने सन्देश दिन उनले आग्रह गरे । कार्यक्रममा अध्यक्ष ओलीले बागमती प्रदेशका नवनियुक्त मुख्यमन्त्री किरण थापा मगर र एमालेबाट शपथ लिएका दुई मन्त्रीलाई सम्मान गरे ।

सो अवसरमा पार्टीका महासचिव शंकर पोखरेलले पार्टीलाई एक ढिक्का बनाएर लैजान सबै लाग्नुपर्नेमा जोड दिए । कार्यक्रममा संयोजक भानुभक्त ढकाल, एमाले सचिव महेश बस्नेतलगायत १५० जना नेताहरूको कार्यशालामा सहभागिता रहेको छ । कार्यशाला आइतबार सम्पन्न हुनेछ ।