काठमाडौं । प्रकृति र आस्थाको महान् पर्व छठको अवसरमा प्रधानमन्त्री बालेन्द्र शाहले स्वदेश तथा विदेशमा बस्ने सम्पूर्ण नेपालीमा हार्दिक मंगलमय शुभकामना व्यक्त गरेका छन्।
आज सामाजिक सञ्जालमार्फत एक शुभकामना सन्देश जारी गर्दै उनले भगवान् सूर्यदेव र छठी माताको आराधना गरी मनाइने यस पर्वले परिवारको सुख, शान्ति, आरोग्य र सन्तानको दीर्घायुको कामना गर्ने उल्लेख गरेका छन्।
छठ पर्वले जीवनको गहिरो दर्शन सिकाउने बताउँदै उनले सन्देशमा भनेका छन्, ‘उदाउँदो सूर्यलाई झैँ अस्ताउँदो सूर्यलाई पनि उत्तिकै श्रद्धा र सम्मानका साथ अर्घ्य दिइने यस परम्पराले प्रकृतिप्रतिको कृतज्ञता र जीवनका हरेक अवस्थालाई सम्मान गर्ने प्रेरणा दिन्छ।’
चार दिनसम्म विधिपूर्वक मनाइने छठको पहिलो दिन नहाय-खाय, दोस्रो दिन खरना, तेस्रो दिन साँझ अस्ताउँदो सूर्यलाई र चौथो दिन बिहान उदाउँदो सूर्यलाई जलाशयको किनारमा अर्घ्य दिने परम्परा रहेको सन्देशमा स्मरण गरिएको छ।
सरकार सबै धर्म, संस्कृति र परम्पराको संरक्षण तथा प्रवर्द्धन गर्न प्रतिबद्ध रहेको जनाउँदै उनले यस पर्वले सबैमा सकारात्मक ऊर्जा भर्दै देशमा सुशासन, सामाजिक न्याय र समृद्धिको संकल्प पूरा गर्ने प्रेरणा प्रदान गरोस् भनी कामना गरेका छन्।
साथै, सन्देशको अन्त्यमा उनले मैथिली भाषामा समेत शुभकामना दिँदै दीनानाथ र छठी परमेश्वरीले सबैको जीवनमा सुख, शान्ति र समृद्धि ल्याउन् भन्ने कामना गरेका छन्।
छैठके बहुत रास शुभकामना ! दीनानाथ आ छैठ परमेश्वरी सब के जीवन में सुख, शान्ति आ समृद्धि लइथिन से कामना करैछि।
युगखबर अनलाइनमा प्रकाशित कुनै सामग्रीबारे कुनै गुनासो, सूचना तथा सुझाव भए हामीलाई [email protected] मा पठाउनु होला । धन्यवाद ।
प्रतिक्रिया