४ सय अमेरिकीसहित ३७ सय सवार जापानको पानी जहाजमा कोरोना संक्रमित भेटियो

काठमाडौं । जापानको क्रुज पानीजहाजमा कोरोना भाइरसबाट संक्रमित भेटिएका छन्। ४ सय अमेरिकीसहित ३७ सय यात्रु सवार उक्त जहावमा १० जनामा कोरोना भेटिएको सीएनएनले जनाएको छ।

जापानका सरकारी स्वास्थ्य अधिकारीहरुका अनुसार यतिबेला डाइमोन्ड प्रिन्सेस जहाजबाट कसैलाई तल झर्न दिएको छैन।

हालसम्म ३ सयजनामा स्वास्थ्य परीक्षण हुँदा १० जना कोरोनबाट संक्रमित भएको बीबीसीले जनाएको छ।

कोरोनाको संक्रमित बढ्ने अनुमान गरिएको छ। जहाजमा चढेका हङकङका ८० वर्षका वृद्धमा पहिलोपटक कोरोना देखिएको जनाइएको छ। अन्य सबै संक्रमित ५० वर्षमाथिको भएको जनाइएको छ।

अधिकारीहरुका अनुसार जहाजमा सवार सबैलाई १४ दिन क्वारेन्टाइनमा निगरानीमा राखिनेछ।

नोबल कोरोना भाइरसबाट मृत्यु हुनेको संख्या ४९२ पुगेको छ। चीनमा मात्रै ४९० जनाको मृत्यु भएको हो।

यस्तै फिलिपिन्समा एक र हङकङमा एक व्यक्तिको मृत्यु भएको छ। बुधबार बिहानसम्मको तथ्यांक अनुसार कोरोनाको संक्रमणबाट २४ हजारभन्दा बढी संक्रमति बनेका छन्।

चीनबाहेक कोरोना २६ राष्ट्रमा फैलिसकेको छ। विश्व स्वास्थ्य संगठनले कोरोनाको महामारीलाई मध्नजर गर्दै सार्वजनिक स्वास्थ्य संकटकाल घोषणा गरिसकेको छ।