टिप्परको ठक्करबाट कलंकीमा दुईजनाको मृत्यु

काठमाडौँ । टिप्परको ठक्करबाट काठमाडौँको कलंकीमा दुईजनाको मृत्यु भएको छ । कलंकीमा रहेको अण्डरपासमा नम्बर नखुलेको टिप्परले मोटरसाइकललाई ठक्कर दिँदा दुईजनाको मृत्यु भएको प्रहरीले जनाएको छ ।

बिहिवार राति पौने १ बजेतिर प्रदेश २ ०३००४ प ५५० नम्बरको मोटरसाइकललाई टिप्परले पछाडिबाट ठक्कर दिएको कलंकी प्रहरीका सई जंगबहादुर आलेले जानकारी दिएका छन् ।

दुर्घटनामा गम्भीर घाइते भएका रौतहट कटहरिया गाउँपालिका–४ का १९ वर्षे राकेशकुमार चौधरी र कटहरिया–७ का २४ वर्षे मुन्ना चौधरीको उपचारका क्रममा त्रिवि शिक्षण अस्पताल महाराजगञ्जमा मृत्यु भएको हो ।

तीव्र गतिमा रहेको टिप्पर मोटरसाइकललाई ठक्कर दिएर फरार भएको हो । टिप्पर तथा चालकको खोजी भइरहेको प्रहरीले जनाएको छ।