काठमाडौँ भित्रिने नाकामा थप कडाइ

काठमाडौँ । प्रहरीले काठमाडौँ उपत्यका भित्रिने नाकाहरुमा थप कडाइ गरेको छ । लकडाउनलाई थप कडाइ गर्न प्रधानमन्त्री केपी ओलीले गृहमन्त्रीलाई निर्देशन दिएपछि प्रहरीले उपत्यका भित्रिने नाकामा थप कडाइ गरेको हो ।

आइतबार साँझदेखि जिल्ला प्रशासन कार्यालयको पास लिएर आएका सवारी साधनलाई पनि चेकजाँचमा कडाइ गरिएको छ। ‘अत्यावश्यकलाई मात्र प्रवेश गर्न दिएका छौँ’, एक प्रहरी अधिकृतले भने, ‘आजदेखि थप कडाइ हुन्छ ।’

‘काठमाडौँ भित्रिने नाकामै पुगिसकेका सवारी साधनलाई परिस्थिति हेरेर भित्रिन दिन्छौँ’, उनले भने, ‘जिल्ला प्रशासनले वितरण गरेको पास व्यवहारिक देखिएको छैन ।’

कैलाली प्रशासनले काठमाडौँसम्म आउने सवारीको पास कसरी दिन सक्छ’, उनले उदाहरण पेश गर्दै भने, ‘ठाउँ अनुसार परिस्थिति भिन्नै छ, पास मात्रै वितरण गरेर हुँदैन।’

जिल्ला प्रशासनले सवारी पास दिने तर प्रहरीले रोक्ने गरेपछि अन्यौल बढेको छ । आफूले वितरण गरेका सवारी पास रोकेपछि सिडिओहरुले प्रहरीलाई फोन गरेर गुनासो गरिरहेका एक प्रहरी अधिकृतले बताएका छन ।

सरकारले चौथो पटक थपेको लकडाउनको अवधि वैशाख २५ गते सकिँदैछ । काठमाडौँ उपत्यकामा कोरोना भाइरसका नयाँ संक्रमित देखिएका छैनन् ।

वैशाख २५ गतेपछि ठाउँ अनुसार लकडाउनको मोडालिटी तयार पारेको सरकारले काठमाडौँ उपत्यकामा खुकुलो पार्ने तयारी गरेको बुझिएको छ ।

त्यसकै तयारीका लागि अन्य जिल्लाबाट काठमाडौँमा मानिसहरुको आवागमनमा सरकारले कडाइ गरेको बुझिएको छ।