रानीपोखरीको पुनःनिर्माण कार्य सुचारू

काठमाण्डाैंः महामारी रोग कोरोना भाइरसको संक्रमण फैलिएसँगै पुनःनिर्माण कार्य रोकिएको पुरातात्त्विक तथा धार्मिक सम्पदा रानीपोखरीको पुनःनिर्माण सुरु भएको छ । राष्ट्रिय पुनःनिर्माण प्राधिकरणका अनुसार आइतबारदेखि नै केही कामदारबाट पुनःनिर्माणको काम सुरु गरिएको हो ।

कोरोना भाइरसबाट जोगिन सामाजिक दूरी कायम राख्नुपर्ने भएकाले थोरैको सङ्ख्याबाट काम सुरु गरिएको प्राधिकरणका स्थलगत संयोजक धु्रव पौडेलले जानकारी दिए । पाँच वर्षअघि २०७२ सालमा आएको विनाशकारी भूकम्पका कारण भत्किएको रानीपोखरीको पुनःनिर्माण कार्य २०७७ साल वैशाख १२ गतेसम्म सम्पन्न गरिसक्ने लक्ष्य भए पनि बन्दाबन्दीले पूरा हुन सकेको थिएन ।

ऐतिहासिक रानीपोखरी र रानीपोखरीको बीचमा रहेको बालगोपालेश्वर मन्दिर निर्माणको जिम्मेवारी सीएम तुल्सी कन्स्ट्रक्सनले लिएको छ । सो कन्स्ट्रक्सनले पुरातात्विक शैलीमा रानीपोखरी र मन्दिरको पुनःनिर्माण १० महिनाभित्र सम्पन्न गर्ने गरी ठेक्का लिए पनि समयमा सम्पन्न भएन । पोखरी निर्माणको करिब ८० प्रतिशत र मन्दिरको ४० प्रतिशत काम सम्पन्न भइसकेको दाबी कन्स्ट्रक्सन कम्पनीको छ ।

प्राधिकरणका अनुसार पोखरी निर्माणमा १४ करोड र मन्दिर निर्माणमा १० करोड रुपियाँ गरी २४ करोड रुपियाँ बजेट छुट्याइएको छ । रानीपोखरी करिब ६३ रोपनीमा फैलिएको छ भने पोखरीको गहिराइ पाँच फिटभन्दा माथि रहेको छ ।

मल्लकालीन रानीपोखरी भूकम्पका कारण भत्किएर पानीसमेत सुकेको थियो । रानीपोखरीमा पानीको व्यवस्था गर्न पोखरीको किनारामा डिप बोरिङ गरी पानी निकाल्ने कामसमेत सम्पन्न भइसकेको छ । पोखरीका लागि करिब ३२ करोड लिटर पानीको आवश्यकता पर्ने अनुमान गरिएको छ ।

चैत ११ गते मुलुकमा बन्दाबन्दी सुरु गरेसँंगै निर्माण कार्य रोकिएको थियो । काम रोकिएको ४पुनःनिर्माणमा दैनिक ६४ जना दक्ष कामदार खटिँदै आएकोमा अहिले १०/१२ जनाबाट काम भइरहेको छ । मजदुरले नै आफू पुनःनिर्माण कार्यमा खटिन तयार रहेको बताएपछि प्राधिकरणले काम सुरु गर्न निर्देशन दिएको हो ।