नेविसंघले मंगलबार देशैभरिका प्रशासन कार्यालयमा ज्ञापनपत्र बुझाउने

काठमाण्डौंः नेपाल विद्यार्थी संघले मंगलबार ७७ वटै जिल्ला प्रशासन कार्यालयमा ज्ञापनपत्र बुझाउने भएको छ ।

लिपुलेकमा भारतद्वारा सडक निर्माण, नेविसंघ प्रदर्शनका क्रममा भएको धरपकड र गिरफ्तारी र सन् २०१५ मा भारत-चीनबीच भएको सम्झौता खारेजीको माग राख्दै मंगलबार ७७ वटै जिल्ला प्रशासन कार्यालयमा ज्ञापनपत्र बुझाइने नेविसंघ अध्यक्ष राजीव ढुंगानाले जानकारी दिएका छन् ।

अध्यक्ष ढुंगानाले ७७ वटै जिल्लामा परिपत्र गर्न लागिएको समेत जानकारी दिएका छन् । लिपुलेक लगायतका नेपाली भूमिमा भारतले गरेको अतिक्रमणको विरोधका क्रममा अध्यक्ष ढुंगााना सहितका १५० नेविसंघ नेता-कार्यकर्तालाई सोमबार दिउँसो प्रहरीले नियन्त्रणमा लिएर साँझ छाडेको थियो । उनीहरुलाई सोमबार राति ८ बजे रिहा गरेको हो ।

यसअघि शुक्रबार भारतले नेपाली भूमि लिपुलेक हुँदै मानसरोवर जाने सडकको उद्‌घाटन गरेपछि देशभर त्यसको विरोध भइरहेको छ ।