अन्तर प्रदेश परिषद् बैठक आज हुँदै

काठमाडौँ – विगतमा बोलाएर पनि स्थगित गरिएको अन्तर प्रदेश परिषद् बैठक आइतबार बस्ने निश्चित भएको छ । केही समयअघि प्रधानमन्त्रीले बैठक बोलाएको भएपनि मुख्य मन्त्रीले पोखरामा भेलाको आयोजना गर्दै केन्द्रीय सरकारप्रति संस्थागत रुपमा नै असन्तसष् िजनाएपछि प्रधानमन्त्रीले बैठक नै स्थगित गर्नुभएको थियो । त्यतिबेला स्थगित गरिएपनि यसपटक भने प्रधानमन्त्रीको इच्छा अनुसार ने आज बैठक बस्न लागेको स्रोतले जनाएको छ ।

प्रदेश सरकार गठनको १० महिनापछि प्रदेश परिषद् बैठक बस्न लागेको हो। बैठकमा सहभागी हुन सातै प्रदेशका मुख्यमन्त्री शनिबारै संघीय राजधानी आएर राजनीतिक भेटघाट सुरु गरेका छन् । उनीहरूले बैठकबाट समस्या समाधान हुने अपेक्षा गरेका छन् ।

प्रधानमन्त्री केपी ओलीको अध्यक्षतामा बस्ने बैठकका लागि सातै प्रदेशका मुख्यमन्त्रीसहित ८० जनाभन्दा बढीलाई निम्ता पठाइएको छ । संविधानमा परिषद् बैठकमा प्रधानमन्त्री, केन्द्र सरकारका गृह र अर्थमन्त्री तथा मुख्यमन्त्रीहरूको सहभागिता रहने व्यवस्था छ ।

प्रधानमन्त्री कार्यालयमा बिहान ११ बजे बोलाइएको बैठकमा केन्द्र सरकारका सबै मन्त्री, राज्यमन्त्री, सचिव, योजना आयोगका उपाध्यक्ष, महान्यायाधिवक्ता, महालेखा नियन्त्रक, प्रदेशका प्रमुख सचिव सहभागी हुनेछन् ।