रास्वपा छाडेका बागमती प्रदेशका उपसभापति हुमागाईं काँग्रेसमा प्रवेश

काठमाडौँ । राष्ट्रिय स्वतन्त्र पार्टी (रास्वपा) बागमती प्रदेशका उपसभापति दिनेश हुमागाईं नेपाली काँग्रेस मा प्रवेश गरेका छन्।

उनीलाई काँग्रेस सभापति गगनकुमार थापा ले आज एक कार्यक्रमबीच पार्टीमा स्वागत गरेका हुन्। पार्टी प्रवेश कार्यक्रममा थापाले लोकतान्त्रिक मूल्य–मान्यताप्रति प्रतिबद्ध व्यक्तिहरू काँग्रेसमा आउनु सकारात्मक संकेत भएको उल्लेख गरे।

हुमागाईंले केही दिनअघि नै रास्वपा परित्याग गरेको घोषणा गरेका थिए। उनले सात बुँदामा असन्तुष्टि राख्दै पार्टीको नीति, संगठन सञ्चालन शैली र निर्णय प्रक्रियाप्रति गम्भीर असहमति जनाएका थिए। पार्टीभित्र आन्तरिक लोकतन्त्र कमजोर भएको, नेतृत्व तहबाट पर्याप्त संवाद नभएको तथा प्रदेश तहका संरचनालाई बेवास्ता गरिएको जस्ता विषय उठाउँदै उनले राजीनामा दिएका थिए।

राजनीतिक वृत्तमा हुमागाईंको काँग्रेस प्रवेशलाई बागमती प्रदेशमा शक्ति सन्तुलनसँग जोडेर हेरिएको छ। रास्वपाबाट आएका नेताहरू काँग्रेसमा समेटिँदै जानुले आगामी निर्वाचन र सांगठनिक संरचनामा प्रभाव पार्ने विश्लेषण गरिएको छ।