रास्वापाले प्रत्यक्ष नजितेका क्षेत्रमा समानुपातिक सांसदलाई तोक्यो जिम्मेवारी

काठमाडौं, ८ वैशाख । राष्ट्रिय स्वतन्त्र पार्टी (रास्वपा) ले प्रत्यक्ष निर्वाचनमा आफूले विजय हासिल गर्न नसकेका निर्वाचन क्षेत्रहरूमा संगठन सुदृढ गर्ने उद्देश्यले समानुपातिकतर्फका सांसदहरूलाई जिम्मेवारी तोकेको छ ।

पार्टीका अनुसार कोशी प्रदेशमा ११ जना, मधेस प्रदेशमा दुई, बागमती प्रदेशमा दुई, गण्डकी प्रदेशमा तीन, लुम्बिनी प्रदेशमा पाँच, कर्णाली प्रदेशमा ११ र सुदूरपश्चिम प्रदेशमा छ जना सांसदलाई विभिन्न क्षेत्रमा खटाइएको छ । पार्टीका महामन्त्री कविन्द्र बुर्लाकोटी ले यस निर्णयमार्फत प्रत्यक्षतर्फ प्रतिनिधित्व नभएका क्षेत्रहरूमा पनि पार्टीको उपस्थितिलाई प्रभावकारी बनाउने लक्ष्य राखिएको जानकारी दिनुभयो ।

तोकिने सांसदहरूले सम्बन्धित क्षेत्रका जनतासँग प्रत्यक्ष सम्पर्क राख्दै स्थानीय समस्याहरू पहिचान गर्ने, समसामयिक मुद्दाहरू उठाउने र ती समस्याको समाधानका लागि समन्वयकारी भूमिका निर्वाह गर्नेछन् । साथै, यस कदमले रास्वपाले १६५ वटै निर्वाचन क्षेत्रमा आफ्नो राजनीतिक पहुँच विस्तार गर्ने रणनीति अघि सारेको संकेत गरेको छ ।

विशेषगरी प्रत्यक्ष निर्वाचनमा कमजोर देखिएका क्षेत्रमा संगठन विस्तार, जनसम्पर्क वृद्धि तथा आगामी निर्वाचनका लागि आधार तयार गर्ने उद्देश्यले यस्तो जिम्मेवारी बाँडफाँड गरिएको विश्लेषण गरिएको छ ।