प्रहरी अधिकृतलाई नै स्काभेटरको पार्टपुर्जा चोरीको आरोप लागेपछी   

काठमाण्डौः धनुषाको मिथिला नगरपालिका स्थित इलाका प्रहरी कार्यालय ढल्केबरमा कार्यरत प्रहरी निरीक्षक अवधकिशोर ओझामाथि स्काभेटरको पार्टपुर्जा चोरी गरेको आरोप लागेको छ ।

वन कार्यालयले नियन्त्रणमा लिएर गत फागुनमा प्रहरीलाई बुझाएको उक्त स्काभेटरको पार्टपुर्जा निकालेर बेचेको स्काभेटर धनीको आरोप लागेको हो ।

स्काभेटर धनी जनुलाल महतोको स्काभेटर इलाका प्रहरी कार्यालय ढल्केबरका प्रहरी अधिकृतले बालुवा वासिङ्ग उद्योगीसँग मिलेर बिक्री गरेको दाबी गर्दै महतोले प्रदेश प्रहरी कार्यालयमा उजुरी दिएका छन् ।

उजुरी परेसँगै प्रदेश प्रहरी कार्यालयले प्रहरी निरीक्षक ओझालाई ढल्केबरबाट प्रदेश प्रहरी गणमा तानेर छानबिन अगाडि बढाएको जनाएको छ ।

घटनाको छानबिन गर्न प्रहरी उपरीक्षक उमाशङ्कर पंजियारको संयोकत्वमा गठित तीन सदस्यीय छानबिन समितिले घटनाको अनुसन्धान प्रतिवेदन प्रदेश प्रहरी नायब महानिरीक्षक प्रद्युम्नकुमार कार्कीलाई बुझाइसकेको बताइएको छ ।

पाटपुर्जा चोरीको घटनामा प्रहरी अधिकृत ओझा दोषी देखिएको ठहर गरी उनलाई विभागीय कारवाही गर्ने निष्कर्षमा पुगेको बताइएको छ ।