पोखरामा चम्ल्याहा शिशुको जन्म, आमा र शिशुहरु सामान्य

काठमाडौं । पोखराको मणिपाल कलेजमा एक महिलाले चम्ल्याहा शिशु जन्माएकी छन्। स्याङ्जाको पुतलीबजार नगरपालिका –१ की २६ वर्षीया सुनिता पौडेल प्रधानले चम्ल्याहा (चार शिशु) शिशुलाई जन्म दिएकी हुन्।

जन्मेका शिशुमध्ये ३ छोरी र १ छोरा हुन्। आमा र शिशुहरुको स्वास्थ्य अवस्था राम्रो रहेको अस्पतालले जनाएको छ। मणिपाल कलेजमा बिहीबार तीन छोरी र एक छोरा जन्माएको उनको शल्यक्रियामा संलग्न डाक्टर महेन्द्र पाण्डेले जानकारी दिएका छन।

उनले पहिलो बच्चा १.६ किलोग्राम तौलकी छोरी, दोश्रो १.३ किलो ग्रामको छोरा, तेश्रो छोरी १.३ किलो ग्राम र चौथो १.४ किलोग्रामकी छोरीलाई जन्म दिएकी हुन्।

सामान्यतयास् नवजात शिशु जन्मिँदा २ देखि २.५ किलो हुनुपर्ने मानिन्छ। तर चार शिशुको कुल तौल ५.६ रहेको अस्पतालले जनाएको छ।

मनिपाल शिक्षण अस्पातलमा डा. महेन्द्र पाण्डेसहितको ४ जनाको टोलीले शल्यक्रिया गरेका थिए। चम्ल्याहा शिशुको जन्म विरलै हुनेगर्दछ। करिब ८ लाखमा एकजनाले मात्र चम्ल्याहा जन्म दिने गरेको अध्ययनले देखाएको डाक्टर पाण्डेको भनाई छ। शिशुलाई केहीदिन अस्पतालमा नै विशेष निगरानीमा राखी स्वास्थ्य सेवा प्रदान गर्ने अस्पतालले जनाएको छ।