क्षेत्रपाल माविले मनायो ४५ औं वार्षिक उत्सव

चौघडा । जिल्लाको लिखु गाउँपलिका वडा नं ४ मा रहेको क्षेत्रपाल माध्यमिक विद्यालयले आफ्नो ४५ औं वार्षिक उत्सव मनाएको छ । गाउँपलिकाका अध्यक्ष धुव्र श्रेष्ठको प्रमुख आतिथ्यतामा भएको कार्यक्रममा विद्यार्थी,शिक्षक तथा अभिभावकहरुको उपस्थिति रहेको थियो । कार्यक्रममा प्रमुख अतिथि श्रेष्ठले विद्यालयले हालसम्म गरेको प्रगतीको प्रसंसा गर्दै यसलाई अझै गुणस्तरीय बनाउँदै लैजान सुझाव दिनुभयो ।

अध्यक्ष श्रेष्ठले सामुदायिक विद्यालयप्रति आम नागरिकको विश्वास कम रहेको तर्फ सचेत हुँदै त्यसमा क्रमश सुधार गरेर अघि बढ्न निर्देशन दिनुभयो । उहाले गाउँपालिकाले सबै सामुदायिक विद्यालयहरुको जिम्मेवारी लिएको भन्दै अब आफ्नो तर्फबाट पनि सरकारी विद्यालयलाई निजी जस्तै गुणस्तरीय बनाउने प्रतिवद्धता समेत व्यक्त गर्नुभयो ।

विद्यालय व्यवस्थापन समितिका अध्यक्ष शैलेन्द्र कुमार राईको सभापतित्वमा भएको कार्यक्रममा गाउँपालिका उपाध्यक्ष रोजिना राई,विद्यालय सचाल समतिका तर्फबाट अमृत श्रेष्ठ,वडा नं ४ का वडा अध्यक्ष दलबहादुर राई, विद्यालय अभिभावक संघका अध्यक्ष रामचन्द्र अगस्ती,लगायतले शुभकामना मन्तव्य व्यक्त गर्नुभएको थियो । सो अवसरमा विद्यालयको कम्पाण्ड वाल लगाउनका लागि सहयोग गर्ने स्पीडवे फाउण्डेसनका प्रवन्धक राजु श्रेष्ठलाई सम्मान गरिएको थियो ।

विभिन्न सांस्कृति कार्यक्रममा तथा सरस्वती माताको पुजाआजा गर्दै वार्षिक उत्सवलाई भव्य रुपमा मनाइएको थियो । सो अवसरमा प्रमुख अतिथि श्रेष्ठले क्षेत्र सामुदायिक क्याम्पस सञ्चालनका लागि गाउँपालिकाबाट ५ लाख दिने घोषणा समेत गर्नुभएको थियो ।