चितवन राइनोजले सुदूरपश्चिमलाई दियो १३० रनको लक्ष्य

काठमाडौं । नेपाल प्रिमियर लिग (एनपीएल) अन्तर्गत सोमबारको दोस्रो खेलमा चितवन राइनोजले सुदूरपश्चिम रोयल्सलाई १३० रनको लक्ष्य दिएको छ।

कीर्तिपुरस्थित त्रिवि क्रिकेट मैदानमा टस हारेर पहिले ब्याटिङ गरेको चितवनले निर्धारित २० ओभरमा ६ विकेट गुमाउँदै १२९ रन बनाएको हो।

चितवनका लागि रवि भोपाराले सर्वाधिक ४९ रनको योगदान दिए। उनले टोलीको इनिङ्स सम्हाल्दै महत्त्वपूर्ण रन जोडे पनि अर्धशतक पूरा गर्न भने सकेनन्।

त्यस्तै, डेविड मलानले १६ रन बनाए भने अर्जुन साउद र सिकन्दर राजाले समान १५–१५ रन जोडे। विवेक यादवले १७ रनको योगदान दिए।

बलिङतर्फ सुदूरपश्चिम रोयल्सका स्कट कुगालिनले उत्कृष्ट प्रदर्शन गर्दै दुई विकेट लिए। त्यस्तै, हेमन्त धामी, दीपेन्द्रसिंह ऐरी र अनिल खरेलले समान एक–एक विकेट हात पारे।

अब सुदूरपश्चिम रोयल्सले जितका लागि निर्धारित २० ओभरमा १३० रन बनाउनुपर्नेछ। चितवनले दिएको लक्ष्य पछ्याउँदै सुदूरपश्चिम मैदानमा उत्रिएको छ।