जसपा नेपालद्वारा चुनावी घोषणापत्र सार्वजनिक

काठमाडौं । जनता समाजवादी पार्टी (जसपा) नेपालले नेपाली समाजको समग्र अर्थ–राजनीतिक रूपान्तरणलाई केन्द्रमा राख्दै आगामी प्रतिनिधिसभा निर्वाचन लक्षित चुनावी घोषणापत्र सार्वजनिक गरेको छ।

शुक्रबार काठमाडौंमा आयोजित कार्यक्रममा पार्टीका अध्यक्ष उपेन्द्र यादवसहित शीर्ष नेताहरूले घोषणापत्र सार्वजनिक गर्दै संविधान, शासन व्यवस्था र सामाजिक न्यायका विषयमा व्यापक पुनरावलोकन आवश्यक रहेको बताएका छन्।

घोषणापत्रमा विभिन्न जनआन्दोलन र मधेस आन्दोलनलगायतका संघर्षबाट मुलुकमा राजनीतिक परिवर्तन भए पनि संघीय पुनर्संरचना, शासकीय स्वरूप, समान जनसङ्ख्याका आधारमा समानुपातिक प्रतिनिधित्व, निर्वाचन प्रणाली, न्याय प्रणाली तथा सामाजिक न्यायको कार्यान्वयनका विषयमा अझै त्रुटि र अपूर्णता रहेको उल्लेख गरिएको छ।

पार्टीले विद्यमान संविधानलाई पूर्णता दिई सर्वस्वीकार्य बनाउने प्रतिबद्धता व्यक्त गरेको छ। अध्यक्ष यादवले सत्ताको दुरुपयोगमार्फत शक्ति आर्जन गर्ने प्रवृत्तिले राजनीतिक अस्थिरता बढाएको आरोप लगाउँदै अपूर्ण संविधानलाई संशोधन र सुधारमार्फत परिमार्जन गरिने बताए।