राजेन्द्र लिङ्देनले गरे नाउपा नेता धनिराम चौधरीलाई राप्रपामा स्वागत

काठमाडौं । नागरिक उन्मुक्ति पार्टी (नाउपा) का नेता धनिराम चौधरी राष्ट्रिय प्रजातन्त्र पार्टी (राप्रपा) मा प्रवेश गरेका छन्।

गत प्रतिनिधिसभा निर्वाचनमा नाउपाबाट रुपन्देही जिल्ला क्षेत्र नम्बर १ मा उम्मेदवार बनेका चौधरीले यसपटक राजनीतिक बाटो परिवर्तन गर्दै राप्रपाको सदस्यता लिएका हुन्। उनले ‘ढकिया’ चुनाव चिन्हबाट प्रतिस्पर्धा गर्दै १३ हजार ९९२ सदर मत प्राप्त गरेका थिए।

भैरहवामा आयोजित एक कार्यक्रमबीच राप्रपा अध्यक्ष राजेन्द्र लिङ्देनले चौधरीलाई पार्टीमा स्वागत गरेका हुन्। चुनावी अभियानका सिलसिलामा रुपन्देही र नवलपरासी जिल्लाका विभिन्न कार्यक्रममा सहभागी हुन भैरहवा पुगेका लिङ्देनले चौधरीको प्रवेशले पार्टीलाई स्थानीय तहमा थप मजबुती मिल्ने विश्वास व्यक्त गरे।

राप्रपाले चौधरीको आगमनले रुपन्देही–१ मा चुनावी समीकरण आफ्नो पक्षमा बलियो हुने अपेक्षा गरेको जनाएको छ। सो क्षेत्रमा राप्रपाबाट प्रज्वल बोहोरा उम्मेदवार रहेका छन्। प्रज्वल, राप्रपाका दिवंगत नेता दिपक बोहोराका सुपुत्र हुन्।

चौधरीको पार्टी प्रवेशलाई आगामी निर्वाचन लक्षित रणनीतिक कदमका रूपमा हेरिएको छ। रुपन्देही–१ क्षेत्रमा विभिन्न दलबीच प्रतिस्पर्धा चर्किँदै गइरहेका बेला चौधरीको निर्णयले स्थानीय राजनीतिक समीकरणमा प्रभाव पार्ने विश्लेषण गरिएको छ।