अपडेट छैनन् सरकारी अफिसका वेबसाइट

काठमाडौं : सरकारी मन्त्रालय तथा कार्यालयका वेबसाइटहरू नियमित रूपमा अपडेट नहुँदा सेवाग्राहीले आवश्यक सूचना सहज रूपमा पाउन सकेका छैनन् । कतिपय वेबसाइट खुल्दैनन् भने खुलेका वेबसाइटमा पनि अद्यावधिक सूचना नहुँदा नागरिक अझै पनि कार्यालय धाउन बाध्य छन् ।

सरकारले अनलाइनमार्फत सूचना उपलब्ध गराउने, अनलाइन फाराम भर्ने तथा सेवा प्रवाहलाई डिजिटल बनाउने योजना अघि सारेको भए पनि व्यवहारमा समस्या यथावत् रहेको सेवाग्राहीको गुनासो छ । अस्पतालहरूमा अनलाइनबाटै नाम दर्ता गर्ने व्यवस्था गरिए पनि बिरामीले लामो लाइन बस्नुपर्ने अवस्था हट्न सकेको छैन ।

नक्सालकी मीना शाहीले यातायात व्यवस्था कार्यालयको लाइसेन्सका लागि अनलाइन फाराम भर्ने प्रयास गरिन् । तर आधा घण्टासम्म पनि सर्भरले काम नगरेपछि उनी कार्यालयमै पुगेर फाराम भर्न बाध्य भइन् । उनले भनिन्, ‘सर्भर निकै स्लो भयो । धेरै समय कुर्न सकिनँ, त्यसैले कार्यालयमै गएर फाराम भरेँ । घरबाटै अनलाइन फाराम भरेर ढुक्क हुने दिन कहिले आउला ?’

वैदेशिक रोजगार बोर्डको सचिवालयको गत आर्थिक वर्षको सूचना खोज्दा पनि वेबसाइट खुलेन । सचिवालयका निर्देशक एवं प्रवक्ता भूपेन्द्र सापकोटाले कहिलेकाहीँ सर्भरले काम नगर्ने समस्या हुने बताए । उनका अनुसार प्राविधिक टोलीलाई बोलाएर वेबसाइट अपडेट गर्ने काम भइरहेको छ ।

केही दिनअघि राष्ट्रिय विपद् जोखिम न्यूनीकरण तथा व्यवस्थापन प्राधिकरणमा पनि यस्तै समस्या देखिएको थियो । सेवाग्राहीले आवश्यक सूचना वेबसाइटमा सहज रूपमा पाउन सकेका छैनन् ।

सूचना प्रविधि विभागकै वेबसाइटमा महानिर्देशकसम्बन्धी सूचना अपडेट छैन । सूचना प्रविधि अधिकृत प्रकाश दवाडीका अनुसार मन्त्रालयहरू मर्ज हुँदा सर्भर व्यवस्थापनमा समस्या आएको हुन सक्ने बताए । तर मन्त्रालय मर्ज हुनुअघि नै धेरै सरकारी वेबसाइट प्रभावकारी रूपमा सञ्चालन हुन नसकेको गुनासो रहँदै आएको छ ।

दवाडीले भने, ‘आइडिएमसीमा केही प्राविधिक समस्या हुन सक्छ । सम्बन्धित मन्त्रालयका केही निजी वेबसाइट पनि छन्, ती सबै हामीले हेर्दैनौं ।’

हाल नेपाल सरकारअन्तर्गतका अधिकांश वेबसाइट ‘डाउन’ भएका छन् । डट जिओभी डट एनपी डोमेन भएका मन्त्रालय, विभाग तथा प्राधिकरणका वेबसाइट खोल्दा ‘दिस साइट कान्ट बी रिच्ड…, इरर…, प्राइभेट… जस्ता सूचना देखिने गरेको सेवाग्राही बताउँछन् ।

एकीकृत डेटा व्यवस्थापन केन्द्र (आइडिएमसी)ले सरकारी वेबसाइट डाउन हुनुको कारण अझै स्पष्ट नभएको जनाएको छ । केन्द्रका सूचना प्रविधि निर्देशक शिवजीकुमार गुप्ता रौनियारका अनुसार समस्याको अध्ययन भइरहेको छ । उनले भने, ‘सरकारी वेबसाइट नचल्ने समस्याबारे अध्ययन भइरहेको छ ।’

तर आइडिएमसीले समस्याको यकिन कारण भने सार्वजनिक गरेको छैन । प्रधानमन्त्री तथा मन्त्रिपरिषद्को कार्यालयदेखि संघीय मन्त्रालय, प्रदेश सरकार र स्थानीय तहका कार्यालयसम्मका धेरै वेबसाइट अद्यावधिक छैनन् । अपडेट भएका वेबसाइटमा पनि सर्भर स्लो हुँदा सेवाग्राहीले हैरानी व्यहोर्नुपरेको छ ।

सरकारले प्रभावकारी, पारदर्शी र नागरिक–केन्द्रित सेवा प्रवाहका लागि डिजिटल रूपान्तरणलाई प्राथमिकतामा राखेको बताउँदै आएको छ । तर व्यवहारमा भने नागरिक अझै पनि लाइनमा बस्न र कार्यालय धाउन बाध्य छन् । मध्यान्ह दैनिकबाट