अहिलेको लडाँई अग्रगमन र प्रतिगमनबिचको : प्रवक्ता श्रेष्ठ

काठमाण्डौं: नेपाल कम्युनिस्ट पार्टी (नेकपा) को प्रचण्ड–माधव नेपाल पक्षका प्रवक्ता नारायणकाजी श्रेष्ठले अहिले पार्टीभित्र रहेको अन्तरसंघर्ष अग्रगमन र प्रतिगमनबीचको भएको  र अन्त्यमा अग्रगमनको जित हुने बताएका छन् ।

उनले प्रधानमन्त्री केपी शर्मा ओलीले पार्टी, देश र जनतालाई विश्वास घात गरेर प्रतिनिधीसभाको आपतकालीन रुपमा विघटन गरी ओली प्रतिगमनको बाटो हिँड्न खोजेको समेत आरोप लगाए ।

मंगलबार राजधानीमा नेकपा बिटमा रिर्पोटिङ गर्ने सञ्चारकर्मीहरुसँगको छलफलमा प्रवक्ता श्रेष्ठले संविधान अनुसार  सर्वोच्चको फैसलाले संसदको पुनर्वाहाली गरी संसद सुचारू हुने समेत दावी गरे ।

संविधानमा भएको प्रावधान अनुसार सरकार बन्न नसक्ने अवस्थामा मात्रै अर्को चुनावमा जान सकिने भन्दै उनले अहिले प्रधानमन्त्रीले सत्ताको दुरुपयोग गर्दै संवैधानिक निकायमाथि हस्तक्षेप बढाउन खोजेको आरोप लगाए ।

प्रवक्ता श्रेष्ठले ‘अदालत, निर्वाचन आयोगमा सेटिङ मिलाएको छ भन्ने हल्ला चलाएको भरमा हुँदैन । सेटिङ मिलाएको भन्नु संवैधानिक निकायमाथिको अवहेलना हो । यदि यी निकायलाई दबाबमा राख्न खोजेमा जनता जाग्नेछन्, यस्तो हुन जनताले दिँदैनन् ,’ उनले भने ।

श्रेष्ठले पार्टीको आधाकारिता र  चुनाव चिन्ह आफूहरुसँगै रहेको पनि दावी गरे । उनले भने,  ‘पार्टी ऐनले प्रस्ट भनेको छ, तत्कालिन पार्टीको बहुमत सदस्य भएको पार्टी मुख्य पार्टी  हो । अर्को पक्षको ४० प्रतिशत पुगेमा पार्टीको मान्यता दिने भनेको छ ।’ त्यसकारण ओलीको पार्टी आधिकारीक हुन नसक्ने समेत उनले बताए ।