स्वास्थ्य सामग्री खरिद प्रक्रियामा प्रश्न उठाउने लेखाप्रमुख कारागार विभागमा सरुवा

काठमाडौँ । स्वास्थ्य सामग्री खरिद प्रक्रियामा प्रश्न उठाउने स्वास्थ्य सेवा विभागका लेखाप्रमुखलाई सरकारले कारागार विभाग सरुवा गरेको छ।

१५ दिनअघि मात्र स्वास्थ्य सेवा विभागमा सरुवा भएका लेखाप्रमुख केशव प्रसाईंलाई मंगलबार राति कारागार विभाग डिल्लीबजार सरुवा गरिएको हो।

उनले स्वास्थ्य सामग्री खरिद प्रकरणमा प्रश्न उठाएपछि रातारात सरुवा गरिएको बुझिएको छ।

स्वास्थ्य मन्त्रालयले गत सोमबार स्वास्थ्य विभागलाई पत्र लेखेर ४० करोड २२ लाख बराबरको स्वास्थ्य सामग्री खरिद गर्न टेन्डर सूचना जारी गर्न निर्देशन दिएको थियो। मन्त्रालयको पत्र आएपछि विभागको व्यवस्थापना शाखाले आर्थिक प्रशासन शाखासँग राय मागेको थियो।

तर, आर्थिक प्रशासन शाखाका उपसचिव प्रसाईंसहितले मन्त्रिपरिषद्ले नै गभर्नमेन्ट टु गभर्नमेन्ट (जिटुजी) प्रक्रियाबाट खरिद गर्ने निर्णय गरेकोले त्यस्तै सामग्री खरिद गर्न अर्को टेन्डर खोल्न नहुने राय दिएको थियो ।

त्यसपछि प्रसाईंलाई कारागार विभाग सरुवा गरिएको छ। उनी कारागार विभागमा बुधबारदेखि हाजिर भएका छन्। प्रसाईँ १५ दिनअघिमात्र स्वास्थ्य सेवा विभाग सरुवा गरिएका थिए।