डडेल्धुरामा अलपत्र र विपन्न नागरिकलाई निःशुल्क खाना खुवाउँदै काँग्रेस

काठमाण्डाैंः  लकडाउनका कारण डडेल्धुरा सदरमुकाममा अलपत्र परेका विपन्न नागरिकहरुका लागि नेपाली काँग्रेस डडेल्धुराले निशुल्क खानाको प्रबन्ध गरेको छ ।नेपाली काँग्रेसका जिल्ला सभापति तथा पुर्वप्रधानमन्त्री शेरबहादुर देउवाको गृहजिल्ला डडेल्धुरामा कोरोना महामारीको सन्त्रासका कारण जारी लकडाउनबाट प्रभावित भएर अलपत्र परेका नागरिकहरुका लागि डडेल्धुरा काँग्रेसले निःशुल्क भोजनको प्रबन्ध गरेको हो ।

नेपाली काँग्रेस डडेल्धुराका संस्थापक सभापति समाजवादी विचारक स्व. एनडीप्रकाश चटौतको स्मरणमा शनिबारदेखि एनडीप्रकाश चटौत आपतकालिन चुल्हो सञ्चालनमा ल्याइएको हो । नेपाली काँग्रेस पार्टी कार्यालय किसुनजी भवनमा हाल खाना खान विपन्न मजदुर र सदरमुकाममा अलपत्र परेका ब्यक्तिहरुको भिड लाग्न थालेको छ । शनिबार बेलुकी २२ जना मजदुरले खाना खाएको र आईतबार बिहान ३६ जनालाई खाना खुवाइएको नेपाली काँग्रेस डडेल्धुराका कार्यालय सचिव राम बिष्टले जानकारी दिए ।

सुदूरपश्चिम प्रदेशको एकमात्र संघीय सरकार मातहतको डडेल्धुरा सदरमुकामस्थित डडेल्धुरा अस्पतालमा उपचार गराउन आएका बिरामीहरु, बिभिन्न कामले सदरमुकाम पुग्न बाध्य जिल्लाबासी र सदरमुकाममै खाना पाउन नसकेर अलपत्र परेका नागरिकहरुका लागि लकडाउन अवधीभर निशुल्क खाना खुवाउने हिसाबले आपतकालिन चुल्हो सञ्चालनमा ल्याइएको नेपाली काँग्रेस डडेल्धुराका सभापति तथा सुदूरपश्चिम प्रदेश सभाका साँसद कर्णबहादुर मल्लले बताए ।

चुल्हो सञ्चालनमा ल्याउन नेपाली काँग्रेस डडेल्धुराले जिल्ला कार्यसमिति सदस्य टंकबहादुर क्षेत्रीको संयोजकत्वमा २१ सदस्यीय सेवा दलसमेत गठन गरेको छ । सेवा दलले भोजनका लागि आवश्यक खाद्यान, नुन, तेल र तरकारी खरिद गर्न आर्थिक व्यवस्थापनका साथै भोका रहेका नागरिकहरुको मागअनुसार भोजन तयार गरेर सुरक्षित रुपमा खुवाउन थालेको छ । कोरोना महामारीको सन्त्रासका कारण सरसफाईमा विशेष ध्यान दिइएको सेवा दलकी सदस्य समाजसेवी पदमा गुरुङले जानकारी दिइन् ।

आपतकालिन चुल्हो सञ्चालन गर्न नेपाली काँग्रेस डडेल्धुराका सभापति तथा प्रदेश सभाका साँसद मल्लले १० क्वीन्टल चामल दान गरेका छन भने सेवा दलका संयोजक क्षेत्रीले दुई क्वीन्टल चामल उपलब्ध गराएका छन । यसैगरि सेवा दलका सदस्यहरुले समेत एक क्वीन्टलका दरले चामल उपलब्ध गराउनुका साथै अन्य खाद्य सामाग्रीका लागि श्रोत जुटाउने छन । नेपाली काँग्रेस डडेल्धुराले यसअघि डडेल्धुराका सातओटै स्थानीय तहमा मास्क, सेनेटाईजर, थर्मल गन, पीपीई र राहातका लागि खाद्यान वितरण गरिसकेको छ ।

कोरोना महामारीका कारण विपद्मा परेका जिल्लाबासीलाई मानवीय सेवाको उदेश्यले सक्दो सहयोग गरिरहेको नेपाली काँग्रेस डडेल्धुराका सभापति तथा साँसद मल्लले बताए । उनले मानव समुदाय संकटमा रहेका बेला ‘सबैलाई प्रेम र स्नेह गर, सबैको सेवा गर’ भन्ने भावनाकासाथ आपतकालिन चुल्हो सञ्चालनमा सहयोग पुगाउन सबैलाई आग्रह गरेका छन । नेपाली काँग्रेस डडेल्धुराले निशुल्क भोजनको ब्यवस्था गरेसँगै डडेल्धुरा सदरमुकामस्थित अपि अस्पतालमा समाजसेवी प्रकाशबहादुर साँउदले एक सय ब्यक्ति बस्नसक्ने गरि आईसोलेसन कक्ष निर्माण गरेर सुत्ने प्रबन्ध गरेका छन् ।