रास्वपाको झापा–५ मा रहेको सम्पर्क कार्यालयमा कस्ले गर्यो तोडफोड ?

विराटनगर । झापा–५ स्थित राष्ट्रिय स्वतन्त्र पार्टी (रास्वपा) को सम्पर्क कार्यालयमा तोडफोड भएको छ । कमल गाउँपालिका–२ मा रहेको रास्वपाको सम्पर्क कार्यालयमा मध्यरातमा अज्ञात समूहले ढुंगा प्रहार गरेको हो ।

उक्त कार्यालय कमल गाउँपालिका–२ निवासी जयप्रकाश अधिकारीको घरमा सञ्चालनमा रहेको थियो । मध्यरातको समयमा अचानक ढुंगा प्रहार हुँदा कार्यालय रहेको घरको झ्यालको सिसा फुटेको छ । घटनामा मानवीय क्षति भने नभएको प्रहरीले जनाएको छ ।

झापाका प्रहरी प्रवक्ता प्रहरी नायब उपरीक्षक (डीएसपी) खगेन्द्रबहादुर खड्काका अनुसार ढुंगा प्रहारबाट घरको झ्यालको सिसा फुटेको भए पनि रास्वपाको कार्यालयभित्र भने कुनै ठूला भौतिक क्षति नभएको जानकारी दिएका छन् ।

प्रहरीका अनुसार घटनापछि स्थानीय प्रहरी टोली घटनास्थलमा पुगेर निरीक्षण गरेको छ भने ढुंगा प्रहार गर्ने व्यक्ति वा समूहको पहिचान गर्न अनुसन्धान अघि बढाइएको छ । घटनाको कारण र उद्देश्य खुल्न बाँकी रहेको प्रहरीको भनाइ छ ।

उक्त क्षेत्रमा प्रतिनिधिसभा निर्वाचनलाई लक्षित गर्दै राजनीतिक गतिविधि बढिरहेका बेला यस्तो घटना भएको हो । झापा–५ बाट रास्वपाका तर्फबाट वरिष्ठ नेता बालेन शाह उम्मेदवार रहेका छन् ।