हरिबोललाई तीन पटक आग्रह गर्दा पनि चुनाव नलडेपछि टिकट राजन दाहाललाई : प्रचण्ड

काठमाडौं । नेपाली कम्युनिस्ट पार्टीका संयोजक पुष्पकमल दाहाल ‘प्रचण्ड’ले हरिबोल गजुरेललाई सिन्धुली–१ बाट चुनाव लड्न पटक–पटक आग्रह गर्दा पनि अस्वीकार गरेपछि परिस्थितिवश पार्टीले कारबाही गर्नुपरेको स्पष्ट पार्नुभएको छ।

सिन्धुली पुगेका संयोजक प्रचण्डले पार्टीभित्रका आन्तरिक समस्या नयाँ नभई विगतदेखि नै रहँदै आएको उल्लेख गर्नुभयो। उहाँका अनुसार उम्मेदवारी मनोनयनअघि आफूले तीन पटकसम्म हरिबोल गजुरेललाई चुनाव लड्न आग्रह गरे पनि उहाँले अस्वीकार गर्नुभएको थियो।

‘मैले तीन पटकसम्म उहाँलाई चुनाव लड्नुस् भनेर भनेँ, तर उहाँले म चुनाव लड्दिनँ भन्नुभयो,’ प्रचण्डले भन्नुभयो, ‘त्यसपछि सिन्धुली–१ बाट हरिबोल गजुरेल र राजन दाहाल गरी दुई जनाको मात्रै नाम सिफारिस भयो। हरिबोलजीले चुनाव नलड्ने निर्णय गरेपछि राजन दाहाललाई टिकट दिइयो।’

प्रचण्डका अनुसार त्यसपछि पनि समस्या समाधान गर्ने उद्देश्यले आफू र सहसंयोजक माधव नेपालले काठमाडौंमै हरिबोल गजुरेल, महेश्वर दाहाल र राजन दाहाललाई बोलाएर छलफल गरे पनि सहमति जुट्न सकेन।

‘उहाँहरूले उठाएको विषयमा राजनजीले आत्मालोचना गर्नुपर्छ भनेर मैले नै भनेको हुँ,’ प्रचण्डले थप्नुभयो, ‘कार्यशैलीमा केही कमजोरी छन् भने लिखित रूपमा पनि आत्मालोचना गर्नुपर्ने कुरा भयो। हरिबोलजीले प्रस्तावकबाट पछि हटिदिनु भयो भने समस्या समाधान हुन्छ भन्ने हाम्रो बुझाइ थियो, तर उहाँहरू त्यसमा तयार हुनुभएन।’

पार्टीको निर्णय नमानेर बागी उम्मेदवारीको प्रस्ताव बनेपछि बाध्य भएर कारबाही प्रक्रिया अघि बढाइएको उहाँको भनाइ छ। प्रचण्डले पार्टी अनुशासन र निर्णयको सम्मान सबैले गर्नुपर्नेमा जोड दिनुभयो।