दुर्गा प्रसाईंको पटक–पटक पक्राउप्रति राप्रपाको गम्भीर आपत्ति

राष्ट्र, राष्ट्रियता, धर्म, संस्कृति र नागरिक बचाउ महाअभियान नेपालका संयोजक दुर्गा प्रसाईंलाई बारम्बार दुःख दिने, फरक विचारलाई निरुत्साहित र दबाउने नियतबाट पटक–पटक पक्राउ गरिएको घटनाप्रति राष्ट्रिय प्रजातन्त्र पार्टी (राप्रपा) ले गम्भीर ध्यानाकर्षण भएको जनाएको छ।

राप्रपाका अध्यक्ष राजेन्द्र लिङ्देनले जारी गरेको विज्ञप्तिमा राज्यले एक व्यक्तिमाथि प्रतिशोध साध्नु अनुचित मात्र नभई नागरिकले स्वतन्त्र रूपमा हिँड्न, डुल्न, बोल्न, लेख्न तथा शान्तिपूर्ण विरोध गर्न पाउने संविधानप्रदत्त अधिकारलाई कुण्ठित गरेको उल्लेख गरिएको छ।

विज्ञप्तिमा दुर्गा प्रसाईंलाई बिना शर्त अविलम्ब रिहा गर्न सरकारसँग माग गरिएको छ। साथै, अभिव्यक्ति स्वतन्त्रता र नागरिक अधिकारको सम्मान गर्न सरकारलाई आग्रह गरिएको छ।

राप्रपाले लोकतान्त्रिक मूल्य र मान्यताविपरीत हुने यस्ता गतिविधि तत्काल रोक्नुपर्ने भन्दै कानुनी शासन र मानवअधिकारको संरक्षणमा राज्य गम्भीर हुनुपर्नेमा जोड दिएको छ।