संविधान संशोधनसहित चुनावी एजेन्डा लिएर जनताका घरदैलोमा जान विप्लवको निर्देशन

रुपन्देही । नेपाल कम्युनिस्ट पार्टीका महासचिव नेत्रविक्रम चन्द विप्लवले आगामी निर्वाचनमा आफ्नो पार्टीका उम्मेदवारलाई संविधान संशोधन र राज्य पुनःसंरचनाको मुद्दा लिएर जनताका घरदैलोमा जान निर्देशन दिएका छन् ।

साविक लुम्बिनी प्रदेश अन्तर्गतका जिल्लाका उम्मेदवार तथा अगुवा कार्यकर्तालाई मंगलबार बुटवलमा प्रशिक्षण दिँदै विप्लवले अहिलेको निर्वाचनमा सबैभन्दा नयाँ र जनताप्रति जिम्मेवार पार्टी नेकपा माओवादी मात्रै रहेको दाबी गरेका छन् ।

जनताले माओवादी पार्टीलाई राष्ट्रिय स्वाधीनताको पक्षमा लड्ने बलियो शक्तिको रुपमा समेत हेरेको दाबी गरेका छन् ।

पछिल्लो समय कतिपय पार्टीले लोकप्रियताको आवरणमा विदेशी डिजाइनको प्रतिनिधित्व गरेको संकेत गर्दै उक्त खेलमा देशभित्र गम्भीर चलखेल भइरहेकोसमेत बताएका थिए ।

महासचिव विप्लवले शुशिला कार्की नेतृत्वको सरकारले स्वतन्त्र पहिचान गुमाएको दाबी गरेका छन् । उनले कार्की सरकार रास्वपाको सरकार भएको उनको तर्क थियो ।

चुनाव गराउने जिम्मा लिएर सरकारको मन्त्री बनेकाहरु जिम्मेवारी छाडेर रास्वपाको उम्मेदवार बन्दै हिंड्नुले अस्वभाविक डिजाइनको संकेत गरेको उनले बताए ।

प्रशिक्षण कार्यक्रममा पार्टीका स्थायी समिति सदस्य सन्तोष बुढामगर, पिविएम वसन्त श्रेष्ठ, बाला थापा, केन्द्रीय सदस्य संगम पुन, धिरज राना, सरद वली लगायतका नेताहरूले सम्बोधन गरेका थिए भने उम्मेदवारहरु सबैले जिल्ला र निर्वाचन क्षेत्रको वस्तुस्थितिबारे रिपोर्टिङ गरेका थिए ।

माओवादीले लुम्बिनी प्रदेशका १२ जिल्लाका २६ निर्वाचन क्षेत्रमध्ये २३ वटा क्षेत्रमा उम्मेदवार दिएको छ । रोल्पामा पार्टीका प्रभावशाली नेता चुडामणि वलीलाई उम्मेदवार बनाएको छ । साबिक लुम्बिनी अञ्चल अन्तर्गतका महत्त्वपूर्ण जिल्ला रुपन्देहीका ५ वटा निर्वाचन क्षेत्रमा माओवादीले उम्मेदवार बनाएको छ ।

रुपन्देही निर्वाचन क्षेत्र ५ मा माओवादी जनयुद्धका पुराना नेता बिष्णु भट्टराईलाई उम्मेदवार बनाएको छ भने रुपन्देही २ मा बिरेन्द्र विकलाई उम्मेदवार बनाएको छ ।

यस्तै रुपन्देही १ मा मदनबहादुर थारु, ३ मा शंकर ज्ञवाली र निर्वाचन क्षेत्र ४ मा बिष्णु तिवारीलाई उम्मेदवार बनाएको छ । यस्तै पाल्पाको निर्वाचन क्षेत्र १ मा बिष्णु ठड्डराई र २ मा जेन्जी युवा पुरन गैरेलाई प्रत्यक्ष तर्फको उम्मेदवार बनाएको नेकपाका केन्द्रीय सदस्य सरद वलीले बताए ।