खोज र उद्धारसँगै थालियो पुनर्स्थापना

काठमाडौँ, भदौ २४ गते । भोटेकोशी बाढी प्रभावित क्षेत्रमा नेपाली सेनाले उद्धार र खोजी अभियानसँगै भत्किएका पुल तथा सडक पुनः सञ्चालन गर्ने कामलाई तीव्र बनाएको छ । क्षतिग्रस्त भौतिक संरचना पुनर्निर्माण गरी प्रभावित बस्तीमा आवागमन सहज बनाउने उद्देश्यले सेनाको इन्जिनियरिङ फौजसमेत परिचालन गरिएको छ । नुवाकोटको विदुर–५, देवीघाटस्थित तादी नदीमा नेपाली सेनाको ५५ जनाको इन्जिनियरिङ टोलीले ‘बेलिब्रिज’ निर्माणलाई तीव्रता दिएको छ ।

सूचना तथा सञ्चारमन्त्री डा. विक्रम तिमल्सिनाले बुधबारसम्म पुल निर्माण सम्पन्न गर्ने गरी काम भइरहेको बताउनुभएको छ । सडक विभागको सहयोगमा ५० भन्दा बढी नेपाली सेना उक्त पुल निर्माणमा खटिएको र बाढी प्रभावित क्षेत्रमा खोज तथा उद्धारसँगै पुनर्स्थापनाको कामलाई तीव्रता दिइएको उहाँले सामाजिक सञ्जालमार्फत जानकारी दिनुभएको छ ।

मन्त्री डा. तिमिल्सिना भदौ १० गतेको बाढीपछि खोज तथा उद्धारलाई प्रभावकारी बनाउन तत्कालै स्थलगत निरीक्षणमा पुगी खोजी, उद्धार तथा राहत व्यवस्थापनमा जुट्नुभएको छ ।

त्यसै गरी ढुङ्गे बुद्ध मन्दिरको तल्लो भागदेखि त्रिशूली बजार जोड्ने करिब २५० मिटर लामो झोलुङ्गे पुल निर्माणका लागि पनि नेपाली सेनाका इन्जिनियरले प्राविधिक परामर्शसहित काम अघि बढाएको जनाइएको छ । नेपाली सेनाका प्रवक्ता राजाराम बस्नेतले बाढीबाट पूर्ण रूपमा क्षतिग्रस्त पुल निर्माण गरी यातायात सञ्चालनमा ल्याउने प्रयास भइरहेको बताउनुभयो । उहाँले भन्नुभयो, “खोज तथा उद्धारसँगै बाढीले पूर्ण रूपमा क्षतिग्रस्त बनाएका पुल र सडक सञ्चालनमा ल्याई प्रभावित क्षेत्रमा पुनर्स्थापना र पुनर्निर्माणका कामलाई पनि प्राथमिकताका साथ अघि बढाइएको छ ।”

चार हजारको हवाई उद्धार

यसैबिच नेपाली सेनाले भोटेकोशी बाढी प्रभावित क्षेत्रमा हवाई उद्धार अभियानलाई निरन्तरता दिँदै हालसम्म हवाई माध्यमबाट चार हजार ८१ जनाको उद्धार गरेको जनाएको छ । सेनाका अनुसार उद्धार गरिएकामध्ये तीन हजार ७९८ जना नेपाली र २८३ जना विदेशी नागरिक छन् । बाढीबाट क्षतिग्रस्त जलविद्युत् आयोजना, सुरुङ, सडक तथा प्रभावित बस्तीमा भने जमिन र प्राविधिक माध्यमबाट खोजी कार्य जारी छ ।

रसुवागढी जलविद्युत् आयोजनामा कम्पोजिट क्विक रेस्पोन्स टिम तथा आयोजनाका प्रतिनिधिसहितको संयुक्त टोली पावरहाउस र कन्ट्रोल प्वाइन्टसम्म पुगेर खोजीमा जुटेका छन् । रसुवा भोटेकोशी जलविद्युत् आयोजनाको रोङ्गास्थित केबल टनेलमा ड्रोन प्रयोग गरेर खोजी गर्दा एउटा शव फेला परेको सेनाले जनाएको छ ।

नेपाली सेनाका अनुसार लाङटाङ जलविद्युत् आयोजनामा पनि संयुक्त उद्धार टोलीले खोजी जारी राखेको छ । चिलिमे हाइड्रोपावरमा विदेशी विशेषज्ञसहितको संयुक्त टोलीले छ÷छ मिटर लामा चार वटा ठुला पाइप प्रयोग गरी सुरुङभित्र आवतजावत गर्न सकिने बाटो तयार गरेको छ । स्याफ्रुबेँसीदेखि चिलिमे जलविद्युत् आयोजनाको सुरुङसम्म भारी उपकरण लैजान सडकमा रहेको ठुलो चट्टान ब्लास्टिङ गरी हटाइएको छ । मुख्य चट्टानसम्म पुग्न अझै ९५ मिटर दुरी बाँकी रहेको सेनाले जनाएको छ ।

नेपाली सेनाका अनुसार विन्च मेसिन र बकेटको प्रयोग गरी सुरुङभित्रको मलबा हटाई सेनासहितको संयुक्त टोली करिब ११५ मिटरभित्र प्रवेश गरी खोजीमा जुटेको छ । माथिल्लो त्रिशूली–१ आयोजनाको मुख्य प्रवेश सुरुङमा विदेशी विशेषज्ञसहितको संयुक्त टोली करिब चार सय मिटरभित्र प्रवेश गरी खोजी गरिरहेको छ ।

त्रिशूली–३ ‘ए’ को पावरहाउस तथा सुरुङमा नेपाली सेनाका ३४, सशस्त्र प्रहरी बलका चार जना र आयोजनाका प्रतिनिधिसहितको टोलीले खोजी गरिरहेको नेपाली सेनाले जनाएको छ । नेपाली सेनाका अनुसार त्रिशूली–३ ‘बी’ मा नेपाली सेनाका १०१ जना र आयोजनाका प्रतिनिधिसहितको संयुक्त टोलीले तीन वटा एक्साभेटर प्रयोग गरी करिब २३ फिट गहिराइसम्म उत्खनन गरेर खोजी गरेको

छ । भौगोलिक कठिनाइ, सुरुङभित्र थुप्रिएको हिलो र क्षतिग्रस्त संरचनाका कारण खोजी चुनौतीपूर्ण बने पनि उपलब्ध जनशक्ति, उपकरण र प्रविधिको अधिकतम प्रयोग गरी उद्धार तथा खोजी अभियानलाई निरन्तरता दिइएको नेपाली सेनाले जनाएको छ ।गोरखापत्र